తొలి సినిమా ‘అఖిల్’ విడుదల కావడానికి ముందు అక్కినేని అఖిల్‌కు వచ్చిన క్రేజ్ అంతా ఇంతా కాదు. కానీ ఆ సినిమా డిజాస్టర్ కావడం.. ఆ తర్వాత రెండు చిత్రాలు కూడా తేడా కొట్టడంతో మాస్ ఇమేజ్, ఫ్యాన్ ఫాలోయింగ్ సంగతి తర్వాత.. ముందు ఓ మోస్తరు విజయం దక్కితే చాలు అనుకునే పరిస్థితి వచ్చింది అక్కినేని అభిమానులకు. వారు కోరుకున్నట్లే ‘మోస్ట్ ఎలిజిబుల్ బ్యాచిలర్’ సక్సెస్ అయింది. దీంతో ఇక అఖిల్‌ను మాస్ హీరోగా ప్రొజెక్ట్ చేసే ప్రయత్నం మొదలైంది.
సురేందర్ రెడ్డి లాంటి స్టార్ డైరెక్టర్‌తో అతను జట్టు కట్టాడు. అఖిల్ ట్రాక్ రికార్డు పట్టించుకోకుండా భారీ బడ్జెట్ పెట్టడానికి అనిల్ సుంకర ముందుకు వచ్చాడు. అలా మొదలైందే.. ఏజెంట్ మూవీ. అఖిల్ కెరీర్లో మేక్ ఆర్ బ్రేక్ సినిమా అవుతుందనే అంచనాలు ‘ఏజెంట్’ మీద ఉన్నాయి. గత ఏడాదే రావాల్సిన ఈ సినిమా షూటింగ్ ఆలస్యం వల్ల వాయిదా పడుతూ వచ్చింది. చివరికి ఏప్రిల్ 28కి ఫిక్స్ అయింది.
ఐతే రిలీజ్ నెలలోకి అడుగు పెట్టినా.. ఈ పాన్ ఇండియా మూవీకి సరైన ప్రమోషన్లు లేవు. సినిమా గురించి ఏ అప్‌డేట్స్ బయటికి రావట్లేదు. షూటింగ్ ఇంకా పెండింగ్ ఉండటంతో ఏప్రిల్ 28న సినిమా రిలీజ్ కావడం సందేహమే అని కొన్ని రోజులుగా జోరుగా ప్రచారం జరుగుతోంది. ఐతే శుక్రవారం ఈ ప్రచారానికి చిత్ర బృందం తెరదించింది. ఒక స్ట్రైకింగ్ పోస్టర్ రిలీజ్ చేసిన టీం.. ఏప్రిల్ 28నే సినిమా రిలీజ్ కాబోతున్నట్లు మరోసారి ధ్రువీకరించింది. ఈ పోస్టర్లో అఖిల్ సూపర్ స్టైలిష్‌గా కనిపిస్తున్నాడు.
ప్రమోషన్లలో వెనుకబడుతుండటానికి టీం అంతా చివరి దశలో షూటింగ్‌లో బిజీగా ఉండటమే కారణమని తెలుస్తోంది. పాన్ ఇండియా స్థాయిలో రిలీజ్ కోసం వివిధ భాషల్లో పోస్ట్ ప్రొడక్షన్ కూడా జోరుగానే జరుగుతోంది. ఈ నెల మూడో వారానికి పని మొత్తం పూర్తి చేసి, ఫస్ట్ కాపీ చేతిలో పెట్టుకుని ఆ తర్వాత అగ్రెసివ్ ప్రమోషన్లు చేయాలని చిత్ర బృందం భావిస్తున్నట్లు కనిపిస్తోంది.
