టాలీవుడ్లో తెర మీదే కాదు.. బయట కూడా కామెడీ పండించే నటుల్లో వెన్నెల కిషోర్ ఒకడు. తెరపై ఆయన్ని చూస్తే చాలు నవ్వొచ్చేస్తుంది. అలాగే సోషల్ మీడియాలో తనను ఫాలో అయ్యే వాళ్లందరికీ నిత్యం నవ్వులు పంచుతుంటాడు ఈ స్టార్ కమెడియన్. ఏ విషయం మీదైనా అతను స్పందించే తీరు కొంచెం భిన్నంగానే ఉంటుంది. తాజాగా తన గురించి వచ్చిన ఒక రూమర్ గురించి స్పందిస్తూ.. తనదైన శైలిలో పంచ్ వేశాడు కిషోర్.
లెజెండరీ నటుడు కమల్ హాసన్ ప్రధాన పాత్రలో ఏస్ డైరెక్టర్ శంకర్ రూపొందిస్తున్న ‘ఇండియన్-2’ సినిమాలో వెన్నెల కిషోర్ నటిస్తున్నాడంటూ సోషల్ మీడియాలో ఒక వార్త తిరుగుతోంది. ఇందులో ఏడుగురు విలన్లు ఉన్నారని.. ఎప్పుడూ కామెడీ పాత్రలే చేసే కిషోర్ ఇందులో మాత్రం ఆ ఏడుగురు విలన్లలో ఒకడిగా కనిపించబోతున్నాడని వార్తలు అల్లేశారు.
ఈ వార్తను కోట్ చేస్తూ ఒక నెటిజన్.. ‘‘కాకా ఏంటి ఇది నిజమా’’ అని ప్రశ్నిస్తూ వెన్నెల కిషోర్‌ను ట్యాగ్ చేశాడు. దీనికి కిషోర్ ఫన్నీగా స్పందించాడు. ‘దుబాయ్ శీను’లోని బ్రహ్మి ఫన్నీ ఎక్స్‌ప్రెషన్‌తో.. ‘‘ఇండియన్-2లో లేను.. పాకిస్థాన్-3లో లేను’’ అని బదులిచ్చాడు. తన గురించి వచ్చిన ఫేక్ వార్తను ఖండించడంలోనూ కిషోర్ తన మార్కును చూపించాడంటూ అతణ్ని ఫాలోవర్లు కొనియాడుతున్నారు.
కిషోర్ తెలుగులో ప్రస్తుతం బిజీయెస్ట్ కమెడియన్. ప్రతి సంవత్సరం అతడి సినిమాలు రెండంకెల సంఖ్యలో రిలీజవుతుంటాయి. సంక్రాంతికి ‘వాల్తేరు వీరయ్య’ సినిమాలో మంచి కామెడీ రోలే చేశాడు కిషోర్. చిరు కొత్త సినిమా ‘భోళా శంకర్’లోనూ అతను ఓ కామెడీ రోల్ చేస్తున్నాడు. ఇంకా మరిన్ని క్రేజీ ప్రాజెక్టుల్లో అతను నటిస్తున్నాడు.
https://twitter.com/vennelakishore/status/1630509090601566208
