నందమూరి బాలకృష్ణ అంటే రెండు రకాలు ఇమేజ్‌లు ఉంటాయి. ఆయన్ను బాగా తెలిసినవారు, ఆయన్ను ఇష్టపడేవారి దృష్టిలో ఒక రకమైన మంచి ఇమేజ్ ఉండగా.. బాలకృష్ణకు నోటి దురుసు, చేతి దురుసు కనిపించిన ప్రతిసారీ ఆయన్ను వ్యతిరేకించే వర్గం ఇంకోటి ఉంటుంది. కానీ, ఇటీవల కాలంలో అన్‌స్టాపబుల్ షో‌తో గతంలో తనను వ్యతిరేకించినవారినీ తన అభిమానులుగా మార్చుకున్నారు బాలకృష్ణ. అంతేకాదు.. ఇటీవల కాలంలో కృష్ణ, కృష్ణంరాజు, సత్యనారాయణ, చలపతిరావు వంటి సీనియర్ నటులు మరణించిన సందర్భాలలో ఆయన వారి గురించి చెప్పిన మంచి మాటలు వంటివి ఆయనకు పాజిటివ్ ఇమేజ్‌ను తీసుకొచ్చాయి.
అయితే.. తన సినిమాల విషయానికి వచ్చేసరికి.. తన తండ్రి ఎన్టీఆర్ విషయానికొచ్చేసరికి ఆయన చెప్పుకొనే గొప్పలు మాత్రం ఇప్పటికీ చాలామందికి చిరాకుపెడుతుంటాయి. తన గురించి, తన తండ్రి ఎన్టీఆర్ గురించి చెప్పుకొనే హక్కు బాలకృష్ణకు ఉందనడంలో సందేహమే లేదు కానీ ఇతరుల గురించి తక్కువ చేసి మాట్లాడినప్పుడే ఆయనపై విమర్శలు మొదలవుతుంటాయి. గతంలో ఆయన చేసిన వ్యాఖ్యల నేపథ్యంలో నాగబాబు సీరియస్‌గా రియాక్టయిన సందర్భాలున్నాయి.
ఇప్పుడు కూడా బాలకృష్ణ నోరుజారడం వివాదంగా మారింది. తాజాగా ఆయన వీరసింహారెడ్డి సినిమా సక్సెస్ మీట్‌లో ‘అక్కినేని, తొక్కినేని’ అనడం వివాదంగా మారింది. ఆయన వ్యాఖ్యలకు కౌంటర్ అన్నట్లుగా అక్కినేని నాగచైతన్య ఈ రోజు ట్వీట్ చేశారు. ‘నందమూరి తారకరామారావు గారు, అక్కినేని నాగేశ్వరరావు గారు, ఎస్వీ రంగారావు గారు కళామతల్లి ముద్దు బిడ్డలు. వారిని అగౌరవపర్చడం మనల్ని మనం కించపరుచుకోవడమే’ అంటూ నాగచైతన్య ట్వీట్ చేశారు. ఇది బాలయ్యకు కౌంటరేనంటున్నాయి సినీవర్గాలు.
కాగా, వీరసింహారెడ్డి సినిమా సక్సెస్ మీట్ సందర్భంగా బాలయ్య ‘అందరూ అద్భుతంగా నటించారు. నాకు మంచి టైం పాస్. ఎప్పుడు కూర్చుని వేదశాస్త్రాలు, నాన్నగారు, డైలాగులు, ఆ రంగారావు గారు, ఈ అక్కినేని తొక్కనేని అన్నీ మాట్లాడుకునేవాళ్లం’ అని అన్నారు. దీంతో అయన అక్కినేని నాగేశ్వరరావు గురించి తేలిగ్గా మాట్లాడారన్న ఉద్దేశంలో నాగచైతన్య కౌంటర్ వేశారు. బాలయ్య ఇటీవలకాలంలో మంచి ఇమేజ్ సంపాదించుకున్నారు. ఇప్పుడిలా మళ్లీ నోరు జారడంతో ఆయన విమర్శకులు నోళ్లకు పనిచెప్తున్నారు.
