టాలీవుడ్ లో ప్రముఖ రచయిత, రాజ్యసభ సభ్యుడు వి.విజయేంద్ర ప్రసాద్ గురించి తెలుగు ప్రజలకు పరిచయం అక్కర లేదు. విజయేంద్ర ప్రసాద్ తనయుడు రాజమౌళి తన దర్శకత్వ ప్రతిభతో ప్రపంచ ఖ్యాతి గడించాడు. తండ్రి కథ అందించి తనయుడు దర్శకత్వం వహించిన అన్ని సినిమాలు బ్లాక్ బస్టర్ హిట్ లుగా నిలిచాయి. ఈ నేపథ్యంలోనే టాలీవుడ్ సూపర్ స్టార్ మహేష్ బాబు తో రాజమౌళి తెరకెక్కించబోతున్న ఎస్ఎస్ఎంబీ29 ప్రాజెక్ట్ ఎలా ఉండబోతుందని సర్వత్రా ఆసక్తి ఏర్పడింది.
ఏస్ రైటర్ విజయేంద్రప్రసాద్, ఏస్ డైరెక్టర్ రాజమౌళిల కాంబినేషన్లో మహేష్ బాబు లాంటి స్టార్ హీరో నటించబోతున్న ఈ సినిమాపై సహజంగానే భారీ అంచనాలున్నాయి. ఆ సినిమా ఏ జానర్ లో ఉండబోతోందోనని మహేష్ బాబు, రాజమౌళి అభిమానులు ఆత్రుతగా ఎదురు చూస్తున్నారు. ఈ నేపథ్యంలోనే తాజాగా ఆ చిత్రానికి సంబంధించిన కీలక విషయాలను రచయిత విజయేంద్ర ప్రసాద్ వెల్లడించారు. చాలాకాలంగా ఫారెస్ట్ అడ్వెంచర్ నేపథ్యంలో ఓ సినిమా చేయాలని రాజమౌళి అనుకుంటున్నాడని, మహేష్ బాబుతో ఈ జానర్ లోనే సినిమా చేయబోతున్నామని ఆయన రివీల్ చేశారు.
మహేష్ బాబు అద్భుతమైన నటుడని, యాక్షన్ సీక్వెన్స్ లలో ఇంటెన్స్ గా నటిస్తాడని విజయేంద్ర ప్రసాద్ కితాబిచ్చాడు. మహేష్ పాత్ర నుంచి తక్కువ సమయంలోనే హావభావాలు పలికించవచ్చని, అందుకని దర్శక నిర్మాతల పని చాలా సులువుగా అవుతుందని అన్నారు. ప్రస్తుతం మహేష్ చిత్రానికి కథ రాసేపనిలో బిజీగా ఉన్నానని, వేర్వేరు ప్రదేశాల్లో కథ కొనసాగుతుందని చెప్పారు. అందుకే, ఈ చిత్ర షూటింగ్ కూడా చాలా దేశాల్లో చేపట్టబోతున్నామని, రాబోయే ఏడాది మే, జూన్ నుంచి సినిమా రెగ్యులర్ షూటింగ్ మొదలవుతుందని విజయేంద్ర ప్రసాద్ చెప్పారు.
