బాలయ్య హోస్ట్‌గా వ్య‌వ‌హ‌రిస్తున్న అన్స్టాపబుల్ కార్య‌క్ర‌మం జ‌న‌రంజ‌కంగా సాగుతున్న‌సంగ‌తి తెలిసిందే. మొద‌టి సీజ‌న్‌ను బ్లాక్‌బ‌స్ట‌ర్ చేసిన బాలయ్య ఇప్పుడు రోండో సీజ‌న్ అన్స్టాపబుల్-2 ను కూడా సూప‌ర్ స‌క్సెస్ చేసే ప‌నిలో ప‌డ్డారు. ఓటీటీ ప్లాట్‌ఫార‌మ్స్‌లో కెల్ల ఆహా ఓటీటీలో ప్ర‌సార‌మ‌వుతున్న ఈ కార్య‌క్ర‌మం తెలుగు రాష్ట్రాల్లో దుమ్మురేపుతోంది. రాజ‌కీయ, సినీ రంగాల‌కు చెందిన ప‌లువుర్నీ ఈ షోకు ఆహ్వానించి వారి నుంచీ స‌ర‌దా సంగ‌తులు చెప్పిస్తూ బాలయ్య ఈ కార్య‌క్ర‌మాన్ని సూప‌ర్ స‌క్సెస్‌గా నిర్వ‌హిస్తున్నారు. చంద్రబాబునాయుడు, లోకేష్, కిరణ్ కుమార్ రెడ్డి లాంటి మ‌హామ‌హులు ఇందులో పాల్గొన‌డం వ‌ల్ల రాజ‌కీయంగా కూడా ఇది చ‌ర్చ‌ల్లో నిలిచింది. అయితే రాజ‌కీయ నేత‌ల‌ను పిల‌వ‌డం వ‌ల్ల వాటిప‌ట్ల ఆస‌క్తి ఉన్న‌వారికి త‌ప్పించి ఎంట‌ర్‌టైన్మెంట్ ల‌వ‌ర్స్‌కు ఇవి అంత‌గా కిక్ ఇవ్వ‌వ‌నే అభిప్రాయం ఆహా టీమ్ లో ఉంది. దీన్ని పోగొట్టి ఈ కార్య‌క్ర‌మం ఎంట‌ర్‌టైన్మెంట్ ల‌వ‌ర్స్‌ను కూడా ఆక‌ట్టుకునే ఆహా బృదం పెద్ద స్కెచ్ వేసిన‌ట్లు తెలుస్తోంది.
అతి త్వ‌ర‌లో ప్రేక్ష‌కులు ఊహించ‌ని విధంగా డార్లింగ్ ప్ర‌భాస్‌ను ఈ షోకు తీసుకువ‌చ్చేంద‌కు స‌న్నాహాలు జ‌రుగుతున్నాయి. దీనికోసం అల్లు అర‌వింద్ తీవ్రంగా ప్ర‌య‌త్నిస్తున్న‌ట్లు ఇన్‌సైడ్ టాక్‌. ఒక‌వేళ ప్రభాస్ గ‌నుక ఈ షోకు వ‌స్తే పంట పండిన‌ట్లే. చ‌లాకీగా జోవియ‌ల్ మాట్లాడే బాలయ్య ముందు సిగ్గ‌రి అయిన ప్రభాస్ ఎలా మాట్లాడుతాడు, మ‌న‌సువిప్పి ఫ్రీగా మాట్లాడ‌తాడా అనే ఆస‌క్తి అంద‌రితోనూ క‌లుగుతుంది. గ‌తంలో ఇదే షోలో మ‌హేశ్‌బాబు ఎపిసోడ్ చాలా బాగా పేలి ప్రేక్ష‌కుల‌కు క‌నెక్ట్ అయింది. త‌రువాత అల్లు అర్జున్‌, విజ‌య్‌దేవ‌ర‌కొండ, విశ్వ‌క్‌సేన్‌, శ‌ర్వానంద్ లాంటి హీరోల‌ను కూడా బాలకృష్ణ డీల్ చేసిన తీరు ప్రేక్ష‌కుల‌కు బాగా న‌చ్చింది. ఇప్పుడు అదే త‌ర‌హాలో ప్ర‌భాస్‌ను కూడా బాలయ్య డీల్ చేస్తార‌ని భావిస్తున్నారు.
అయితే ఈ షోకు రావ‌డానికి బాహుబ‌లి గ్రీన్ సిగ్న‌ల్ ఇచ్చాడా లేదా అనే స‌స్పెన్స్ ఇంకా కొన‌సాగుతోంది. దీనిపై స్ప‌ష్టత రావాలంటే మ‌రికొన్ని రోజులు ఆగాల్సి ఉంది. నిప్పు లేనిదే పొగ‌రాదు కాబ‌ట్టి దీనికి సంబంధించి ఏదో జ‌రుగుతుంది జ‌రుగుతోంది కాబ‌ట్టే ఈ వార్త షికార్లు కొడుతోంద‌ని సినీ వ‌ర్గాలు భావిస్తున్నాయి. ఒక‌వేళ ప్రభాస్ గ‌నుక ఈ షోకు వ‌స్తే అది అభిమానుల‌కు పండ‌గే అవుతుంది. ఈ షోలో ప్రభాస్ త‌న పెళ్లి గురించి, త‌న పెద‌నాన్న కృష్ణంరాజుతో త‌న‌కున్న అనుబంధం, త‌ను అతిథుల‌కు ఇచ్చే ఆతిథ్యంలో వ‌డ్డించే భోజ‌నాలు వంట‌లు, ఆదిపురుష్ గురించి వ‌స్తున్న కామెంట్లు త‌దిత‌ర అనేక అంశాల గురించి ప్రభాస్ ఆస‌క్తిక‌ర‌మైన అంశాలు వెల్ల‌డించే అవ‌కాశాలున్నాయి.
ఈ వార్త నిజం కావాలని, బాలయ్య షోలో డార్లింగ్ ప్రభాస్ మెరిసి త‌మ మ‌న‌సుల‌ను దోచుకోవాల‌ని ఆయ‌న అబిమానులు ఆశ‌గా కోరుకుంటున్నారు.
