మాస్ కా బాప్, నందమూరి నటసింహం బాలకృష్ణ హోస్ట్ గా వ్యవహరిస్తున్న అన్ స్టాపబుల్ విత్ ఎన్బికె కార్యక్రమం రెండో సీజన్ కూడా దిగ్విజయంగా కొనసాగుతున్న సంగతి తెలిసిందే. ఏపీ మాజీ సీఎం టిడిపి అధినేత నారా చంద్రబాబునాయుడుతో తొలి ఎపిసోడ్ ను మొదలుపెట్టిన బాలయ్య ఆ తర్వాత యంగ్ హీరోలు విశ్వక్సేన్, సిద్దు జొన్నలగడ్డలతో రెండో ఎపిసోడ్, శర్వానంద్, అడవి శేషులతో మూడో ఎపిసోడ్లను రక్తి కట్టించారు.
ఇక, నాలుగో ఎపిసోడ్లో తన క్లాస్మేట్స్, స్నేహితులు అయిన ఏపీ మాజీ సీఎం నల్లారి కిరణ్ కుమార్ రెడ్డి, టిఆర్ఎస్ రాజ్యసభ సభ్యుడు సురేష్ రెడ్డి, సీనియర్ నటి రాధికలతో గుర్తుకొస్తున్నాయి అంటూ తన ఆటోగ్రాఫ్ స్వీట్ మెమోరీస్ ను బాలయ్య నెమరేసుకున్నారు. ఈ క్రమంలోనే తాజాగా ఈ సీజన్ 5వ ఎపిసోడ్ కు గెస్టులుగా ప్రముఖ దర్శకనిర్మాత కె రాఘవేంద్ర రావు, ఎ.కోదండరామిరెడ్డిలతోపాటు ప్రముఖ నిర్మాతలు అల్లు అరవింద్, సురేష్ బాబులను బాలయ్య ఆహ్వానించారు.
తాజాగా ఆ షోకు సంబంధించిన ప్రోమో ఆహా టీం విడుదల చేయడంతో అది వైరల్ గా మారింది. ఆ ప్రోమోలో సురేష్ బాబు, అల్లు అరవింద్ లను బాలయ్య తనదైన ప్రశ్నలతో ఇరుకున పెట్టే ప్రయత్నం చేశారు. టాలీవుడ్లో నెపోటిజం గురించి మీ అభిప్రాయం ఏమిటి అంటూ ఇద్దరినీ బాలయ్య ప్రశ్నించడంతో వారు సైలెంట్ అయ్యారు. ఇక ఇండస్ట్రీలో ఆ నలుగురు హీరోలదే హవా అని చాలాకాలంగా విమర్శలు ఉన్నాయని, ఆ నలుగురిలో ఇద్దరు మీ ఫ్యామిలీలో నుంచే ఉన్నారని బాలయ్య కామెంట్ చేయడంతో అక్కడ అంతా సీరియస్ వాతావరణం ఏర్పడింది.
ఇక, 40 ఏళ్లుగా ఈ ఇద్దరు నిర్మాతల మధ్య శాండ్ విచ్ లా నలిగిపోతున్నానని, ఈ షోలో కూడా ఆ ఇద్దరి మధ్య కూర్చోబెడుతున్నారంటూ రాఘవేంద్రరావు సెటైర్ వేయడంతో షోలో నవ్వులు పూశాయి. మరోవైపు ఎన్టీఆర్ శతజయంతి సందర్భంగా ఆయనకు నివాళులు అర్పిస్తూ బాలయ్య చెప్పిన మాటలు ఈ షోకు హైలైట్ గా నిలిచాయి. డిసెంబర్ రెండవ తేదీ రాత్రి 9 గంటలకు ఆహా ఓటీటీలో ఈ ఎపిసోడ్ టెలికాస్ట్ కాబోతుంది.
