టాలీవుడ్లో నెమ్మదిగా ఫ్రాంఛైజీ సినిమాల సందడి పెరుగుతోంది. ఎఫ్-2 సిరీస్‌లో ఇప్పటికే రెండు సినిమాలు వచ్చాయి. ఇంకో సినిమా తీసే ఆలోచన కూడా ఉంది. కార్తికేయ ఫ్రాంచైజీ బంపర్ క్రేజ్ సంపాదించుకుంది. ఇందులో సెకండ్ పార్ట్ చాా పెద్ద హిట్ కావడంతో.. మూడో పార్ట్ దిశగా చిత్ర బృందం అడుగులు వేస్తోంది. ఇక త్వరలోనే ‘హిట్’ ఫ్రాంచైజీలో కొత్త సినిమా చూడబోతున్నాం. ‘హిట్’లో విశ్వక్సేన్ హీరోగా కనిపిస్తే.. హిట్-2లో అడివి శేష్ లీడ్ రోల్‌లో సందడి చేయబోతున్నాడు.
ఈ సినిమా టీజర్ గురించి మూడు రోజుల కిందట అప్‌డేట్ ఇస్తూ దర్శకుడు శైలేష్ కొలను, హీరో శేష్ కలిసి చేసిన వీడియో అందరినీ ఆకట్టుకుంది. అందులో ‘హిట్’ మల్టీవెర్స్‌ను హిట్-2లో చూపించబోతున్నామని.. విశ్వక్సేన్ కథ హిట్-1తో ముగిసినట్లేమీ కాదని.. ఇందులో విశ్వక్సేన్ కూడా ఒక సన్నివేశంలో కనిపిస్తాడని సంకేతాలు ఇచ్చాడు శైలేష్.
ఆ వీడియో చివర్లో హిట్-3 గురించి శైలేష్ చెప్పబోతుంటే.. హిట్-2నే ఇంకా రిలీజ్ కాలేదు అప్పుడే హిట్-3నా అంటూ అతడికి బ్రేక్ వేశాడు శేష్. కాగా ‘హిట్-2’ టీజర్ లాంచ్ సందర్భంగా హిట్ మల్టీవర్స్ గురించి శైలేష్ మాట్లాడాడు.
‘హిట్’కు సంబంధించినంత వరకు ఏ ఒక్కరో హీరో కాదని.. ఈ మల్టీవెర్స్‌లో చాలామంది హీరోలున్నారని.. వాళ్లంతా వేర్వేరు ప్రాంతాల్లో డ్యూటీలు చేస్తుంటారని.. ఎవరి టైం వచ్చినపుడు వాళ్లు తమ సత్తా చూపిస్తారని చెప్పాడు. ‘హిట్-2’లో విశ్వక్ కూడా కనిపిస్తాడని చెప్పిన శైలేష్.. ఇందులో అంతకుమించిన సర్ప్రైజ్ ఒకటుందని చెప్పాడు. బహుశా హిట్-3లో కనిపించబోయే హీరో ఎవరో ఇందులో వెల్లడించబోతున్నారని అనిపిస్తోంది. అంతే కాక విశ్వక్, శేష్‌లతో పాటు కూడా మూడో పార్ట్‌లో కనిపించనున్న హీరో.. ఈ ముగ్గురినీ కలిపి ఒక సన్నివేశంలో చూపిస్తారని తెలుస్తోంది. ‘హిట్’ ఫ్రాంఛైజీలో సినిమాలు హిట్టవుతున్న కొద్దీ ఒక్కో హీరోను యాడ్ చేస్తూ కొత్త సినిమా తీస్తూనే వెళ్లేలా ఉన్నారు.
