అన్ స్టాపబుల్ విత్ ఎన్బీకే సీజన్ 2 టాక్ షో తొలి ఎపిసోడ్ రికార్డు వ్యూస్ తో స్ట్రీమ్ అవుతోన్న సంగతి తెలిసిందే. టీడీపీ అధినేత చంద్రబాబు గెస్ట్ గా రావడం, ఆయనను నందమూరి బాలకృష్ణ హోస్ట్ చేయడంతో ఈ ఎపిసోడ్ ట్రెండింగ్ లో ఉంది. ఈ షోలో మాట్లాడిన చంద్రబాబు…1995 వైశ్రాయ్ ఎపిసోడ్ తో పాటు పలు ఆసక్తికర విషయాలను వెల్లడించారు. అయితే, ఈ షోలో చంద్రబాబు, లోకేష్ లు చేసిన వ్యాఖ్యలపై వైసీపీ నేత, మంత్రి అంబటి రాంబాబు వివాదాస్పద వ్యాఖ్యలు చేయడం సంచలనం రేపింది.
చంద్రబాబు, బాలకృష్ణ, లోకేశ్ లను అవమానరిచేలా అంబటి వ్యాఖ్యలు చేయడంపై టీడీపీ నేతలు ఫైర్ అవుతున్నారు. తన స్వార్థం కోసమే బాలకృష్ణ టాక్ షోలో చంద్రబాబు పాల్గొన్నారని విమర్శించిన అంబటిని దుయ్యబడుతున్నారు. ఈ నేపథ్యంలో అంబటి రాంబాబుపై టీడీపీ సీనియర్ నేత చింతకాయల అయ్యన్న పాత్రుడు విమర్శలు గుప్పించారు. టాక్ షోకే మీకు తడిచిపోతోంది ఏంటి రాంబాబు అంటూ అయ్యన్న సెటైర్లు వేశారు.
నువ్వు ఎంత గొంతు చించుకున్నా బాబాయ్ పై గొడ్డలి వేటు వేసిన అబ్బాయ్ జగన్ రెడ్డి జైలుకు పోవడం ఖాయమని అయ్యన్న సంచలన వ్యాఖ్యలు చేశారు. తల్లికి, చెల్లికి వెన్నుపోటు పొడిచిన దుర్మార్గుడిగా జగన్ చరిత్రలో నిలిచిపోవడం ఖాయమని అయ్యన్న జోస్యం చెప్పారు. మరోవైపు, ఈ ఎపిసోడ్ నేపథ్యంలో బాలకృష్ణపై తెలుగు అకాడమీ చైర్ పర్సన్ లక్ష్మీపార్వతి చేసిన వ్యాఖ్యలపై కూడా టీడీపీ నేతలు మండిపడుతున్నారు.
తమ తప్పులను కప్పిపుచ్చుకోవడానికే చంద్రబాబు, బాలకృష్ణ ఈ షోను ఎంచుకున్నారని లక్ష్మీ పార్వతి చేసిన ఆరోపణలపై సోషల్ మీడియాలో టీడీపీ కార్యకర్తలు ఫైర్ అవుతున్నారు. అసలు పార్టీ ముక్కలు కావడానికి లక్ష్మీ పార్వతే కారణమని నెటిజన్లు ఏకిపారేస్తున్నారు. బాలకృష్ణను విమర్శించే స్థాయి లక్ష్మీపార్వతికి లేదని ట్రోల్ చేస్తున్నారు.
