అన్ స్టాపబుల్ విత్ ఎన్బీకే టాక్ షోలో గెస్ట్ గా టీడీపీ ఎమ్మెల్సీ నారా లోకేష్ పాల్గొన్నార్న వార్త సంచలనం రేపుతోంది. నందమూరి నరసింహ బాలకృష్ణ హోస్ట్ గా వ్యవహరిస్తున్న ఈ షో రెండో సీజన్ తొలి ఎపిసోడ్ కు టీడీపీ అధినేత చంద్రబాబుతోపాటు లోకేష్ కూడా పాల్గొని సందడి చేశారు. తాజాగా విడుదలైన ప్రోమోలో లోకేష్ ను బాలయ్య అడిగిన ప్రశ్నలు హాట్ టాపిక్ గా మారాయి. లోకేష్ గెస్ట్ గా వస్తారని ప్రచారం జరిగినా..ప్రోమోలో కనిపించే వరకు ఆహా టీం సస్పెన్స్ మెయింటెన్ చేసింది.
మంగళగిరిలో ఓటమి గురించి లోకేష్ ను బాలయ్య ప్రశ్నించారు. అయితే, ప్రజలకు మంచి చేద్దాం అనే సంకల్పంతో వచ్చానని, కానీ ఫలితం అనుకూలంగా రాలేదని లోకేష్ చెప్పినట్లుగా ఆ ప్రోమోలో కనబడుతోంది. అమెరికాలో ఉన్న సమయంలో స్విమ్మింగ్ పూల్ లో లోకేష్ దిగిన ఫోటో గురించి కూడా బాలయ్య ప్రశ్నించారు. ఈ ఫోటో అసెంబ్లీ వరకు వెళ్లింది అంటూ లోకేష్ ను బాలకృష్ణ అడిగారు. ఈ ఫోటోపై మీ స్పందన ఏమిటి అంటూ చంద్రబాబును బాలయ్య ప్రశ్నించారు.
మామకు లేని సందేహం నాకెందుకు ఉంటుంది అంటూ బాలకృష్ణను ఉద్దేశించి చంద్రబాబు జవాబిచ్చారు. ఇక, తన మేనల్లుడు అయిన లోకేష్ బాల్యాన్ని గుర్తు చేసిన బాలకృష్ణ అప్పట్లో లోకేష్ ఏ వస్తువు కనిపిస్తే అది తనదేనంటూ మారాం చేసేవాడని గుర్తు చేసుకున్నారు. అలా అంటూనే చివరకు నారా బ్రాహ్మణిని లోకేష్ పెళ్లి చేసుకున్నాడని బాలయ్య సెటైర్ వేశారు. ఇక, ఈ షోకు గెస్ట్ గా వచ్చిన లోకేష్…బాలకృష్ణను గెస్ట్ గా చేసి కాసేపు తాను హోస్ట్ గా మారారు.
ఈ సందర్భంగా ఇంట్లో వంట ఎవరు చేస్తారు మావయ్య అంటూ బాలకృష్ణను లోకేష్ ప్రశ్నించారు. అయితే, తాను వంట గురించి సలహాలు మాత్రమే ఇస్తానని బాలయ్య సరదాగా జవాబిచ్చారు. ఇక, తండ్రీకొడుకులు ఇద్దరు కలిసి నా కాపురంలో నిప్పులు పోస్తున్నారంటూ బాలయ్య చేసిన సరదా కామెంట్లు వైరల్ గా మారాయి. ఏది ఏమైనా బావబామ్మర్దులు, మామాఅల్లుళ్ళ సరదా, సీరియస్ సంభాషణల ప్రోమో వీడియో ఇప్పుడు ట్రెండింగ్ లో ఉంది.
ఈ ఫుల్ ఎపిసోడ్ లో రాజకీయపరంగా మరిన్ని విషయాలను చంద్రబాబు, లోకేష్ లు వెల్లడించబోతున్నట్లుగా ప్రోమోను చూస్తే అర్థమవుతుంది. ఈ నేపథ్యంలోనే ఈనెల 14న ఆహా ఓటీటీలో స్ట్రీమ్ కాబోతున్న తొలి ఎపిసోడ్ కోసం టీడీపీ, నందమూరి, నారా అభిమానులతోపాటు యావత్ తెలుగు ప్రేక్షకులు ఆసక్తిగా ఎదురుచూస్తున్నారు.
