మాస్ కా బాప్, నటసింహా నందమూరి బాలకృష్ణ హోస్ట్ గా ఆహా ఓటీటీలో ‘అన్ స్టాపబుల్ ఎన్ బీకే’ టాక్ షో ప్రారంభమైన సంగతి తెలిసిందే. గత ఏడాది దీపావళి కానుకగా ఆహాలో మొదలైన ఈ షో బాలయ్య అభిమానులు ఆహా…అనేలా చేసింది. అన్ స్టాపబుల్ విత్ ఎన్బీకే టాక్ షో ఆహా ఓటీటీకి కొత్త ఊపును ఇచ్చిందనడంలో ఎటువంటి సందేహం లేదు. తొలి సీజన్ లో టెలికాస్ట్ అయిన ప్రతి ఎపిసోడ్ కు అనూహ్య స్పందన వచ్చింది.
బాలయ్య తనదైన డైలాగులతో హావభావాలతో..స్టెప్పులతో ఈ షోను మరో లెవల్ కు తీసుకువెళ్లారు. హీరో బాలయ్య హోస్ట్ ఏంటి అని పెదవి విరిచిన వారంతా… ఈ షో చూశాక బాలయ్యలో ఈ యాంగిల్ కూడా ఉందా అని ముక్కున వేలేసుకున్నారు. మంచు మోహన్ బాబు ఫ్యామిలీ, పుష్ప టీం, రవితేజ, అఖండ టీం, బ్రహ్మానందం, రాజమౌళి, మహేష్ బాబు.. ఇలా పలువురు సెలబ్రిటీల సందడితో మొదటి సీజన్ 10 ఎపిసోడ్స్ గ్రాండ్ గా ముగిశాయి.
ఇలా, బాలయ్య బాబులోని మరో కోణాన్ని చూపించిన అన్ స్టాపబుల్ విత్ ఎన్బీకే షఓ రెండో సీజన్ తో అదరగొట్టేందుకు రెడీ అవుతోంది. ఈ అక్టోబర్ నుంచి రెండో సీజన్ స్ట్రీమ్ కాబోతోందని తాజాగా ఆహా టీం అఫీషియల్ గా ప్రకటించింది. ఈ క్రమంలోనే ఫ్యాన్స్ లో జోష్ నింపేందుకు బాలయ్య యాంథమ్ సాంగ్ ను రిలీజ్ చేసింది. ర్యాప్ సింగర్ రోల్ రైడా ఆలపించగా, మెలోడీ బ్రహ్మ మణిశర్మ తనయుడు మహతి స్వరసాగర్ కంపోజ్ చేసిన ఈ యాంథమ్ సాంగ్ యూట్యూబ్ లో దుమ్మురేపుతోంది.
అన్ స్టాపబుల్ విత్ ఎన్బీకే షో గురించి, బాలయ్య గురించి, బాలయ్య బాబు నటించిన సినిమా పేర్లు, డైలాగులతో ఈ యాంథమ్ క్యాచీగా ఉంది. బాలయ్యను ఎలివేట్ చేస్తూ.. “తాను ఎంట్రీ ఇస్తే కంట్రీ అంతా ఊగేనంటా.. డైలాగ్ వదిలితే మోగిపోద్ది బాడీ అంతా.. మాటలు తప్పలేవు రాంగ్ వే.. ఎందుకంటే బాలయ్యే వన్ వే” అంటూ రాసిన లిరిక్స్ బాలయ్య ఫ్యాన్స్ కు పూనకాలు తెప్పిస్తాయనడంలో సందేహం లేదు. యాంథమ్ మధ్యలో బాలయ్య పవర్ ఫుల్ డైలాగ్స్ యాడ్ చేయడంతో ఈ సాంగ్ వేరే లెవల్లో ఉంది.
