టాలీవుడ్ యువ హీరోలలో అడివి శేష్ తనకంటూ ఓ ప్రత్యేకమైన గుర్తింపు తెచ్చుకున్నాడు. క్షణం, గూఢచారి, ఎవరు వంటి విభిన్న చిత్రాలతో ఆకట్టుకున్న అడివి శేష్ చాలా రోజుల తరువాత మరో విభిన్నమైన సినిమాతో ప్రేక్షకుల ముందుకు రాబోతున్నాడు. ’26/11′ ఉగ్ర దాడుల్లో అశువులు బాసిన మేజర్ సందీప్ ఉన్నికృష్ణన్ జీవితం ఆధారంగా తెరకెక్కుతోన్న ‘ మేజర్ ‘ చిత్రంలో అడివి శేష్ సందీప్ పాత్ర పోషిస్తున్నాడు.
సూపర్ స్టార్ మహేష్ సొంత బ్యానర్ బీఎంజీ ఎంటర్టైన్మెంట్స్ , సోనీ పిక్చర్స్ శరత్ చంద్ర సంయుక్తంగా నిర్మిస్తున్న ఈ సినిమా ఫస్ట్ గ్లింప్స్ ను నేడు మహేష్ బాబు విడుదల చేశారు. మేజర్ సందీప్ ఉన్ని కృష్ణన్ పుట్టినరోజు సందర్భంగా విడుదలైన ఫస్ట్ గ్లింప్స్ సోషల్ మీడియాలో వైరల్ అయింది. మంటల్లో నిలుచున్న అడివి శేష్ హై వోల్టేజ్ లుక్ తో యాంగ్రీ యంగ్ మ్యాన్ గా కనిపిస్తున్నాడు. ఈ చిత్ర టీజర్ ను మార్చ్ 28న రిలీజ్ చేయనున్నారు.
‘గూఢచారి’ సినిమా దర్శకుడు శశికిరణ్ తెరకెక్కిస్తున్న ఈ చిత్రంలో తెలుగమ్మాయి శోభిత ధూళిపాళ్ల, బాలీవుడ్ బ్యూటీ సయీ మంజ్రేకర్ కీలక పాత్రల్లో నటిస్తున్నారు. ఈ చిత్రానికి స్క్రీన్‌ప్లేను అడవి శేష్ అందిస్తున్నారు. జూలై 2న ఈ సినిమాను ప్రపంచవ్యాప్తంగా విడుదల చేసేందుకు సన్నాహాలు చేస్తున్నారు. గూఢచారి తరహాలోనే మేజర్ కూడా బ్లాక్ బస్టర్ హిట్ అవుతుందని చిత్ర యూనిట్ ఆశాభావం వ్యక్తం చేస్తోంది.
