టాలీవుడ్ దర్శక ధీరుడు రాజమౌళి తెరకెక్కిస్తోన్న‘ఆర్ఆర్ఆర్’ చిత్రంపై భారీ అంచనాలున్న సంగతి తెలిసిందే. జక్కన్న చెక్కుతోన్న ఈ పాన్ ఇండియా మూవీ కోసం దేశవ్యాప్తంగా సినీ అభిమానులు ఆతృతగా ఎదురుచూస్తున్నారు. మెగా పవర్ స్టార్ రామ్ చరణ్, యంగ్ టైగర్ జూనియర్ ఎన్టీఆర్ వంటి స్టార్ హీరోలతో జక్కన్న మలిచిన ఈ భారీ పాన్ ఇండియా మల్టీస్టారర్ మరో బాహుబలి కానుందని అంచనాలున్నాయి.
ఆ అంచనాలకు తగ్గట్టుగానే ‘ఆర్ఆర్ఆర్’ నుంచి విడుదలైన ప్రతి అప్డేట్ ట్రెండింగ్ లో ఉంది. ఇక, ఇండియాస్ బిగ్గెస్ట్ మల్టీ స్టారర్ మూవీ అయిన ఆర్ఆర్ఆర్ ను వరల్డ్ వైడ్‌గా ఇంగ్లీష్, పోర్చు గీస్, కొరియన్, తుర్కిష్, స్పానిష్‌ భాషలతోపాటు అన్ని దక్షిణాది భాషల్లో మార్చి 25న భారీస్థాయిలో విడుదల చేయబోతున్నారు. ఈ క్రమంలోనే ఈ చిత్ర ప్రమోషన్స్ లో భాగంగా తాజాగా ‘ఎత్తర జెండా’ పాటను విడుదల చేసింది చిత్ర యూనిట్.
ఎంఎం కీరవాణి సంగీతం అందించిన ఈ పాటను రామజోగయ్య శాస్త్రి రాశారు. ఈ పాటకు ఎన్టీఆర్, రామ్‌చరణ్‌, అలియా భట్ లు అదిరిపోయే స్టెప్పులేశారు. స్వాతంత్ర్య సమరయోధుల గురించి వివరిస్తూ సాగే ఈ పాట ఆకట్టుకుంటోంది. ప్రస్తుతం ఈ పాట యూట్యూబ్ లో ట్రెండ్ అవుతోంది. వాస్తవానికి ఈ పాటను ఈ రోజు సాయంత్రం 4గంటలకు విడుదల చేయాల్సి ఉంది. అయితే, సాంకేతిక సమస్యల కారణంగా ఈ పాటను రేపుఉదయం 10 గంటలకు రిలీజ్ చేస్తామని చిత్ర యూనిట్ తెలిపింది. అయితే, అనూహ్యంగా సాయంత్రం 7 గంటలకు ఈ పాటను సర్ ప్రైజ్ ప్యాకేజ్ లా విడుదల చేశారు.
