గతంలో మెగా ఫ్యామిలీపై వివాదాస్పద దర్శకుడు రామ్ గోపాల్ వర్మ పలుమార్లు సంచలన వ్యాఖ్యలు చేసిన సంగతి తెలిసిందే. నాగబాబు, పవన్ కల్యాణ్ లపై వర్మ చేసిన కామెంట్లు గతంలో పెను దుమారం రేపాయి. ఆ తర్వాత కొన్నాళ్లుగా సైలెంట్ గా ఉన్న వర్మ…తాజాగా మరోసారి మెగా ఫ్యామిలీపై షాకింగ్ కామెంట్లు చేశారు. భవిష్యత్తులో మెగా కుటుంబ సభ్యులందరికీ.. భారత్ లో ఏ మూలకు వెళ్లినాసరే అల్లు అర్జున్ బంధువులుగానే గుర్తింపు లభిస్తుందంటూ వివాదాస్పద ట్వీట్ చేశారు.
మెగా కుటుంబంతో డైరెక్ట్ గా రక్త సంబంధం లేకపోయినప్పటికీ… ఆ మెగా ఫ్యామిలీలో అల్లు అర్జున్ ఒక్కడే మెగా అంటూ వర్మ చేసిన ట్వీట్ పై మెగాఫ్యాన్స్ మండిపడుతున్నారు. ఇక, అల్లు అర్జున్ భవిష్యత్ లో ‘ఒమెగా’ OMEGA అవుతాడంటూ కామెంట్ చేశారు. అల్లు అర్జున్ నవతరం రజనీకాంత్ అని, అతడిలో సహజ సిద్ధంగా ఉండే విశ్వాసం, బయటకు కనిపించే తీరు చిరంజీవి లాంటి ఇతర కుటుంబ సభ్యులతో పోలిస్తే పదిరెట్లు ఎత్తులో ఉంచుతాయని కితాబిచ్చారు. ఇక, అల్లు అర్జున్ ను కన్నందుకు అల్లు అరవింద్ మెగా ప్రౌడ్ గా ఉండాలంటూ ట్వీట్ చేశారు.
ఈ ట్వీట్ల నిమిషాల వ్యవధిలోనే వైరల్ అయ్యాయి. వాటిపై మెగా ఫ్యాన్స్ ఫైర్ అవుతూ వర్మపై ట్రోలింగ్ కు దిగారు. దీంతో, వర్మ అన్ని ట్వీట్లను డిలీట్ చేశాడు. అయితే, వాటి స్థానంలో మాత్రం సింపుల్ గా ఓ ట్వీట్ చేసి దాన్ని ఉంచాడు. కొత్త మెగా అంటే అల్లు అర్జున్ అనేది నిర్వివాదాంశమంటూ ట్వీట్ చేసి సైలెంట్ అయ్యాడు వర్మ. మరి, ఈ వ్యవహారంపై మెగా ఫ్యామిలీ స్పందన ఏమిటన్నది ఆసక్తికరంగా మారింది.
