టాలీవుడ్ ఐకాన్‌స్టార్‌ అల్లు అర్జున్, విలక్షణ దర్శకుడు సుకుమార్ ల కాంబోలో వచ్చిన ‘పుష్ప’ చిత్రం పాన్ ఇండియా రేంజ్ లో మంచి టాక్ తెచ్చుకున్న సంగతి తెలిసిందే. సౌత్ లోనే కాకుండా నార్త్ల్ లోనూ పుష్పరాజ్ కలెక్షన్ల సునామీ రేపాడు. ఇక, పిల్లల నుంచి పెద్దల వరకు తగ్గేదేలో అంటూ పుష్ప మేనియాలో ఉన్నారు. పుష్పలోని శ్రీవల్లి పాటకు టీమిండియా క్రికెటర్లు సైతం స్టెప్పులు వేస్తుండగా…చాలామంది సెలబ్రిటీలు పుష్పకు ఫ్యాన్స్ అయ్యారు.
తాజాగా పుష్ప చిత్రంపై విశ్వనటుడు కమల్ హాసన్ ప్రశంసలు కురిపించారు. పుష్ప చిత్రం సంగీత దర్శకుడు దేవీ శ్రీ ప్రసాద్ తో కలిసి కమల్‌హాసన్‌ చిత్రాన్ని వీక్షించారు. వీరిద్దరూ కలిసి అమెజాన్ ప్రైమ్‌లో ‘పుష్ప’ చిత్రాన్ని చూశారు. ఆ సందర్భంగా కమల్‌తో దిగిన ఫొటోను దేవిశ్రీ ప్రసాద్ తన ట్విటర్ ఖాతాలో పోస్ట్ చేశారు. తమకోసం విలువైన సమయాన్ని కేటాయించి ‘పుష్ప’ సినిమా చూసినందుకు ఉలగనయగన్‌ కమల్ హాసన్ కు ధన్యవాదాలంటూ దేవీ ట్వీట్ చేశారు.
తమ సినిమా చూసి తమ పనితనం గురించి కమల్ చెప్పిన మాటలు అద్భుతమని దేవీ కొనియాడారు. ఇక, దేవీ చేసిన ట్వీట్‌కు అల్లు అర్జున్ స్పందించారు. ‘సినిమా చూసినందుకు ధన్యవాదాలు’ కమల్ సార్‌ అంటూ అల్లు అర్జున్ ట్వీట్ చేశారు. ఇక, అమెజాన్ ప్రైమ్ లో అన్ని భాషల్లో విడుదలైన పుష్ప రికార్డు వ్యూస్ తో దూసుకుపోతోంది. సంక్రాంతి పండుగ నేపథ్యంలో వచ్చిన సెలవులను పుష్ప ఆన్ లైన్ లో నూ క్యాష్ చేసుకుంది.
