ఒకటి కాదు రెండు కాదు ఏకంగా నెలన్నర ముందు నుంచి బయటకు వస్తున్న లీకులే నిజమయ్యాయి. బిగ్ బాస్ సీజన్ 5 విజేతగా సన్నీనే అవుతారన్న లీకులు పెద్ద ఎత్తున బయటకు రావటం.. చివరకు అదే నిజం కావటం గమనార్హం.
దాదాపు ఐదు గంటల పాటు సాగిన గ్రాండ్ ఫినాలే ప్రోగ్రాంలో సాగదీసి.. సాగదీసి బిగ్ బాస్ 5 విజేతను వెల్లడించారు. దీసి గా సన్నీని ప్రకటించిన వెంటనే.. అతగాడు ఆనందాన్ని తట్టుకోలేకపోయారు. కాసేపు ఇష్టారాజ్యంగా వ్యవహరించాడు.
షోను హోస్టు చేసే నాగార్జునను ఎత్తుకోవటంతో పాటు.. హగ్ చేసుకున్నాడు.. బుగ్గన కిస్ చేశాడు.. అరుపులు.. కేకలు వేయటం.. తాను ధరించిన కోట్ ను విప్పదీసి.. గిర గిర గాల్లోకి తిప్ప విసిరేయటంతో పాటు.. చాలానే చేశాడు.
ఎన్నో ఏళ్లుగా తాను పడుతున్న కష్టానికి ఎట్టకేలకు ఫలితం దక్కిందని పేర్కొన్నారు. రన్నరప్ గా నిలిచిన షణ్నూను గట్టిగా హగ్ చేసుకోవటంతో పాటు.. అతడికి కూడా గాఢమైన ముద్దు పెట్టేశాడు. ఇక.. కొడుకు విజేతగా నిలిచిన వేళ సన్నీ తల్లి తీవ్ర భావోద్వేగానికి గురయ్యారు.
టీవీల్లో ఆమె ఆనందాన్ని చూసినోళ్లంతా అంతే ఆనందానికి.. భావోద్వేగానికి గురయ్యారు. ఈ పోటీలో సన్నీకి గట్టి పోటీని ఇచ్చిన షణ్ముఖ్ చివరి వరకు వచ్చి.. విజేతగా మాత్రం నిలవలేకపోయారు. మొత్తంగా బిగ్ బాస్ సీజన్ 5 రన్నరప్ గా మిగిలారు.
ఆదివారం రాత్రి టెలికాస్టు అయిన గ్రాండ్ ఫినాలేలో టాప్ 5లో మొదటి ఎవిక్షన్ లో సిరి మొదటగా బయటకు రాగా.. రెండో ఎవిక్షన్ లో మానస్.. మూడో ఎవిక్షన్ లో శ్రీరామచంద్ర బయటకు వచ్చేశారు. చివరకు నిలిచిన సన్నీ.. షణ్ముఖ్ లో విజేతగా సన్నీని ప్రకటించారు.
బిగ్ బాస్ సీజన్ 5 విజేతగా.. ట్రోఫీతో పాటు.. రూ.50 లక్షల చెక్ తో పాటు సువర్ణ భూమి ఇన్ ఫ్రాస్టక్చర్ నుంచి షాద్ నగర్ లో రూ.25 లక్షలు విలువ చేసే 300 గజాల భూమిని సొంతం చేసుకున్నాడు. దీంతో పాటు.. టీవీఎస్ వారి అపాచీ లేటెస్టు బైక్ ను గెలుచుకున్నాడు.
గ్రాండ్ ఫైనల్ కు కాస్త ముందు.. షణ్నూ.. సిరి రిలేషన్ మీద తనదైన శైలిలో వ్యాఖ్యలు చేసిన సన్నీ.. గ్రాండ్ ఫినాలే స్టేజ్ మీద మాత్రం అందుకు భిన్నమైన వ్యాఖ్య చేయటం గమనార్హం. షణ్ను.. సిరికి అంత మంచి స్నేహం దొరకటం లక్ అని.. తనకూ మానస్ కూ మధ్య అలాంటి స్నేహమే ఉందన్నాడు. నువ్వు చాలామంది మనసులు గెలుచుకున్నావ్ షణ్నూ అంటూ ఆనందంగా పొగడ్తల వర్షాన్ని కురిపించాడు. దీంతో.. షణ్నూ.. సిరిల మీద తాను చేసిన కామెంట్లను వెనక్కి తీసుకున్నట్లైంది.
బిగ్ బాస్ 5 విజేత హోదాలో మాట్లాడుతూ.. తనను గెలిపించిన ఆడియన్స్ ను ఎప్పటికీ ఎంటర్ టైన్ చేస్తూ ఉంటానని పేర్కొన్నారు. ‘మనమెంత కొట్టుకున్నా సరే.. హౌస్ మేట్స్ అందరం కలిసే ఉందాం. మనం అనుకున్నట్లు ఉందాం. ఎంత కొట్టుకున్నా.. పక్కరోజుకు అంతా మామూలే అయిపోయేవాళ్లం. అమ్మ అడిగిన మొట్టమొదటి బహుమతి బిగ్ బాస్ ట్రోఫీ’’ అని చెప్పటంతో పాటు.. ఆ ట్రోఫీని ఆమె చేతుల్లో పెట్టి సంతోషపడిపోయాడు.
విజేతగా నిలిచిన సన్నీ ఆనందం ఇలా ఉంటే.. రన్నర్ గా నిలిచిన షణ్నూకు కూడా సువర్ణ భూమి వారు సన్నీకి ఇచ్చినంత కాకున్నా.. కాస్త తక్కువైనా ఫ్లాట్ ఇవ్వటం ఖాయమని.. త్వరలోనే తమ కార్యాలయంలో జరిగే కార్యక్రమంలో షణ్నూకు భూమిపత్రాలు ఇస్తామని పేర్కొన్నారు.
105 రోజులుగా సాగుతున్న బిగ్ బాస్ 5 ఇంతటితో ముగిసింది. ప్రేక్షకుల ఓట్లే విజేతను నిలిపాయి అని చెప్పినా.. ఈ షోకు సంబంధించి మొదట్నించి బయటకు వచ్చిన లీకులే నిజం కావటం.. ఒక్కటి కూడా తేడా కాకపోవటం గమనార్హం. మరి.. ప్రేక్షకుల ఓట్లే లెక్క తేల్చేటప్పుడు.. లీకులే ఎందుకు నిజమైనట్లు చెప్మా?
