తన అభిమానుల ఆకాంక్షలను అర్థం చేసుకుని చాలా గ్యాప్ తర్వాత తన కొత్త చిత్రం ‘రాధేశ్యామ్’ నుంచి ఒక కానుక ఇచ్చాడు ప్రభాస్. శనివారం యంగ్ రెబల్ స్టార్ పుట్టిన రోజు సందర్భంగా ఈ సినిమా నుంచి ప్రభాస్ క్యారెక్టర్ విక్రమాదిత్య టీజర్‌ను రిలీజ్ చేసిన సంగతి తెలిసిందే.
ఈ టీజర్లో ప్రభాస్ చెప్పిన డైలాగ్స్ పూర్తిగా ఇంగ్లిష్‌లోనే సాగాయి. తనకు అందరి గురించి అన్నీ తెలుసని.. కానీ ఏవీ చెప్పనంటూ నిగూఢమైన అర్థం వచ్చేలా డైలాగ్స్ చెప్పాడు ప్రభాస్. ఈ మాటలు సినిమాలో ప్రభాస్ పాత్ర పట్ల ఆసక్తిని రేకెత్తించాయి. ఇంతకీ ఆ పాత్ర ఏంటనే విషయంలో రకరకాల చర్చలూ నడుస్తున్నాయి.
ఐతే సినిమాల నుంచి ఏ చిన్న అవకాశం వచ్చినా మీమ్ కంటెంట్ పట్టేసి సోషల్ మీడియాలో రచ్చ లేపే జనాలు మాత్రం విక్రమాదిత్య విషయంలో ఒకటి ఫిక్సయిపోయారు. అతణ్ని ఒక జ్యోతిష్యుణ్ని చేసి పడేశారు.
నాకు అన్నీ తెలుసు.. అన్నీ తెలుసు అని ప్రభాస్ పదే పదే చెప్పడంతో ప్రభాస్‌ను వివిధ సినిమాల్లో చూసిన జ్యోతిష్యుల పాత్రలతో పోలుస్తూ మీమ్స్ చేస్తున్నారు నెటిజన్లు. ముఖ్యంగా ‘వెంకీ’ సినిమాలో బాగా పాపులర్ అయిన మల్లికార్జున రావు పాత్ర (జగదాంబ చౌదరి)తో ప్రభాస్ క్యారెక్టర్‌ను పోలుస్తూ బోలెడన్ని మీమ్స్ కనిపిస్తున్నాయి సోషల్ మీడియాలో.
అంతే కాక.. వివిధ విషయాలపై భవిష్యత్‌లో ఏం జరుగుతుందో చెప్పాలంటూ ఫన్నీ మీమ్స్ కూడా తయారు చేస్తున్నారు. ‘‘మా బెంగళూరు టీం ఎప్పుడు ఐపీఎల్ ట్రోఫీ గెలుస్తుందో చెప్పు బ్రో’’.. ‘‘ఈ ప్రపంచకప్‌లో అయినా కోహ్లి జట్టుకు ట్రోఫీ అందిస్తాడో లేదో చెప్పు బ్రో’’.. ఇలాంటి ఫన్నీ కామెంట్స్‌తో మీమ్స్ కనిపిస్తున్నాయి.
అలాగే అల్లు అర్జున్ ఫేమస్ కామెంట్‌.. ‘చెప్పను బ్రో’కు, ప్రభాస్ క్యారెక్టర్‌కు ముడిపెట్టి కూడా మీమ్స్ తయారు చేస్తున్నారు నెటిజన్లు. మొత్తానికి చాలా సీరియస్‌గా సాగిన ‘రాధేశ్యామ్’ టీజర్ నుంచి ఇంత ఫన్ జనరేట్ చేయడం విశేషమే.
