ఈ సోషల్ మీడియా జమానాలో ముక్కు మొహం తెలియని వారు కూడా ఓవర్ నైట్ లో వైరల్ అయిపోయిన ఘటనలు అనేకం ఉన్నాయి. ఈ కోవలోనే ”అయ్యయ్యో వద్దమ్మా.. సుఖీభవ.. సుఖీభవ” అంటూ హైదరాబాద్ లోని నల్లకుంటకు చెందిన శరత్ వేసిన స్టెప్పులు సోషల్ మీడియాలో వైరల్ అయిన సంగతి తెలిసిందే. అయితే, అనూహ్యంగా తాజాగా శరత్ పై దాడి జరిగిన ఘటన కలకలం రేపుతోంది. శరత్ ముక్కు, మొఖంపై తీవ్ర గాయాలు కావడంతో ఆ ఫొటోలో వైరల్ అయ్యాయి.
ఏదో ఒక ఫంక్షన్ జరుగుతున్న సందర్భంగా కొందరు వ్యక్తులు శరత్ పై దాడి చేసినట్లుగా ఆ చిత్రాలను బట్టి అర్థమవుతోంది. శరత్ను కొందరు వ్యక్తులు దారుణంగా కొట్టినట్లు తెలుస్తోంది. అయితే, అసలా గొడవ ఎందుకు జరిగింది? శరత్ ను కొట్టిన వారెవ్వరన్న సంగతిపై స్పష్టత రావాల్సి ఉంది. ఈ ఘటనపై శరత్ ఎటువంటి ప్రకటన చేయలేదు. ఏది ఏమైనా ఓవర్ నైట్ లో పాపులర్ అయిన శరత్ …ఇలా గాయాలపాలవడం పలువురిని కలచివేసింది.
ఒ ప్రముఖ టీ బ్రాండ్ రూపొందించిన యాడ్ ను శరత్ ఇమిటేట్ చేసి వైరల్ అయిన సంగతి తెలిసిందే. ఆ యాడ్ లో ఓ హిజ్రా చెప్పిన డైలాగును చెప్పిన శరత్…ఆ వెంటనే డ్యాన్స్ చేయడం వైరల్ అయింది. ఓ వేడుక సందర్భంగా ఆ యాడ్ను ఇమిటేట్ చేసిన శరత్..’అయ్యయ్యో వద్దమ్మా.. ఈ పక్కనే ఓ టీ కొట్టు పెట్టాను.. అందరికీ ఓ కప్పు టీ ఇస్తున్నాను.. డబ్బులు తీసుకోను కానీ.. సుఖీభవ.. సుఖీభవ’ అంటూ డ్యాన్స్ చేశాడు. ఆ వీడియో వైరల్ కావడంతో శరత్ సోషల్ మీడియాలో పాపులర్ అయ్యాడు. ఇంతలోనే అతడిపై దాడి జరగడంపై నెటిజన్లు స్పందిస్తున్నారు.
