ఈ ఏడాది జరిగిన మూవీ ఆర్టిస్ట్స్ అసోసియేషన్ (మా) అధ్యక్ష ఎన్నికలు రసవత్తరంగా సాగిన సంగతి తెలిసిందే. మా అధ్యక్ష పదవి కోసం ప్రకాశ్ రాజ్, మంచు విష్ణుల ప్యానెల్ ల మధ్య హోరాహోరీగా పోరు జరిగింది. ప్రకాశ్ రాజ్ ప్యానెల్ కు పరోక్షంగా చిరంజీవి మద్దతునివ్వగా…మంచు విష్ణు ప్యానెల్ కు బాలకృష్ణ మద్దతిచ్చారు. నువ్వా నేనా అన్నట్లు జరిగిన ఈ ఎన్నికల్లో మంచు విష్ణు విజయం సాధించి మా అధ్యక్షుడిగా బాధ్యతలు చేపట్టారు.
ఈ నేపథ్యంలోనే తాజాగా మంచు విష్ణు తన తండ్రి మోహన్ బాబుతో కలిసి నందమూరి బాలకృష్ణతో భేటీ అయ్యారు. బాలయ్య ఇంటికి వెళ్లిన మోహన్ బాబు, విష్ణు…ఆయనకు కృతజ్ఞతలు తెలిపారు. ఈ సందర్భంగా మోహన్ బాబు సంచలన వ్యాఖ్యలు చేశారు. గత అసెంబ్లీ ఎన్నికల్లో తాను బాలకృష్ణ అల్లుడు నారా లోకేశ్ కు వ్యతిరేకంగా ప్రచారం చేశానని, కానీ, ఆ విషయాన్ని మరచిపోయి విష్ణుకు బాలయ్య మద్దతిచ్చారని షాకింగ్ కామెంట్లు చేశారు.
లోకేశ్ ను ఓడించేందుకు వైసీపీకి అనుకూలంగా పని చేశానని, కానీ, బాలయ్య అవేవీ గుర్తు పెట్టుకోకుండా విష్ణుకు మద్దతు ఇచ్చారని మోహన్ బాబు అన్నారు. విష్ణుకు అండగా ఉండి ఓటు వేసిన బాలకృష్ణకు కృతజ్ఞతలు చెప్పేందుకే ఆయన ఇంటికి వెళ్లామని, ‘మా’ భవనం విషయంలో విష్ణుకు అండగా ఉంటానని బాలకృష్ణ హామీ ఇచ్చారని మోహన్‌బాబు వెల్లడించారు.
