YSRCP తిరుగుబాటు MP రఘు రామ కృష్ణం రాజు ఎన్నారైలకు సంచలన పిలుపు ఇచ్చారు. తమ పార్టీ రాజ్యసభ ఎంపీ మరియు జాతీయ కార్యదర్శి విజయ సాయి రెడ్డి మరియు CM వైఎస్ జగన్ మోహన్ రెడ్డికి ఈ వ్యాఖ్యలు గట్టి షాకే ఇచ్చాయి. వైసీపీ అధికారంలోకి వచ్చాక వైజాగ్ లో అనేక భూకుంభకోణాలు జరుగుతున్న విషయం తెలిసిందే. ఇటీవల కొత్తగా రూ .100 కోట్ల భూ కుంభకోణం గురించి రఘురామరాజు బయటపెట్టారు.
తాజాగా మరో కీలక విషయాన్ని RRR బయటపెట్టారు. ఆయన మీడియాతో మాట్లాడుతూ, వైజాగ్ మరియు పరిసర ప్రాంతాల్లో భూములు కలిగి ఉన్న ఎన్నారైలకు ప్రమాద ఘంటికలు ఆసన్నమైనాయని, వారు చాలా జాగ్రత్తగా ఉండాలని రఘురామరాజు పిలుపునిచ్చారు. ఇప్పటికే వైజాగ్ లో తమ భూములు ఆక్రమణకు గురైనట్టు అమెరికా నుంచి పలువురు ఎన్నారైలు తనకు ఫోన్ చేసి ఆందోళన చెందారని వెల్లడించారు.
“వైజాగ్‌లో రూ. 100 కోట్ల విలువైన భూమిని పవర్ ఆఫ్ అటార్నీ ద్వారా ఒక వ్యక్తి అక్రమంగా స్వాధీనం చేసుకుని మా పార్టీ ఎమ్మెల్యేకు రిజిస్టర్ చేయించినట్లు నా దృష్టికి వచ్చింది” అని ఫైర్‌బ్రాండ్ పారిశ్రామికవేత్త, రాజకీయ నాయకుడు అయిన రఘురామరాజు సంచలన స్కాం బహిరంగ పరిచారు.
ఈ నేపథ్యంలో ఎన్నారైలకు రఘురామరాజు ముఖ్యమైన పిలుపు ఇచ్చారు. మీ వైజాగ్ స్థలాలకు కాంపౌండ్ వాల్ మరియు ఫెన్సింగ్‌ని ఏర్పాటు చేయడం ద్వారా వైజాగ్‌లోని తమ భూములను రక్షించుకోవాలని ఎన్‌ఆర్‌ఐలందరినీ ఆర్ఆర్ఆర్ సూచించారు. అలాగే పేపర్ యాడ్ జారీ చేయడం లేదా సైన్ బోర్డు ఏర్పాటు చేయడం మీ ఉనికిని సమాజానికి చెప్పమన్నారు.
ఇవన్నీ చేసినా కబ్జాలు జరిగితే… ఎన్నారైలకు అండగా నిలిచి వారి ఆస్తులను కాపాడతానని రఘురామరాజు ప్రతిజ్ఞ చేశారు. ఈ విషయాన్ని మన ముఖ్యమంత్రి వైఎస్ జగన్‌కు లేఖ ద్వారా తీసుకెళ్తానని కూడా చెప్పారు.
విజయ సాయి రెడ్డి ప్రగతి భారతి ట్రస్ట్ ఏర్పాటు చేసి వైజాగ్‌లో రూ .100 కోట్లు వసూలు చేశారని ఆర్ఆర్ఆర్ పరోక్షంగా ఆరోపించారు. “ఆ 100 కోట్లు ఏమయ్యాయో ఎవరికీ తెలియదు. కాబట్టి వైజాగ్‌లో ఆస్తులు కలిగి ఉన్న ఎన్నారైలందరూ ఈ 100 కోట్ల ఎపిసోడ్‌ను ఉదాహరణగా తీసుకొని వారి ఆస్తులను కాపాడాలని నేను అభ్యర్థిస్తున్నాను, ” అని ఎంపీ రఘురామరాజు హెచ్చరించారు.
వైజాగ్ లో మీరు ముఖ్యమైన విషయం గమనించండి… అక్కడ రెడ్డి కలెక్టర్, రెడ్డి జాయింట్ కలెక్టర్ మరియు రెడ్డి అర్బన్ డెవలప్‌మెంట్ కమిషనర్ మాత్రమే ఉన్నారు. దీని వెనుక వ్యూహం కూడా ఆలోచించండి. మీ స్థలాలు జాగ్రత్త అని రఘురామరాజు అన్నారు.
