సీఎం జగన్ పై టీడీపీ సీనియర్ నేత, రాజమండ్రి రూరల్ ఎమ్మెల్యే, టీడీపీ పోలిట్ బ్యూరో సభ్యుడు గోరంట్ల బుచ్చయ్య చౌదరి సంచలన వ్యాఖ్యలు చేశారు. ఏపీని అవినీతి కేంద్రంగా, దోపిడీ కేంద్రంగా మార్చారని అమిత్ షా అన్న మాటలను గోరంట్ల ఉటంకించారు. కేంద్రం నిధులు జగన్ దారిమళ్లిస్తున్నారని, కేంద్ర పథకాలకు రాష్ట్రం పేరు పెట్టి వాడుతున్నారని అమిత్ షా, నడ్డాలు చేసిన వ్యాఖ్యలపై గోరంట్ల స్పందించారు.
ఏపీలో పవన్ చేపట్టిన వారాహి యాత్ర. లోకేష్ యువగళం యాత్ర. చంద్రబాబు యాత్ర….ఎవరి యాత్రను జగన్ అడ్డుకోలేరని అన్నారు. తన యాత్ర కూడా కొనసాగుతుందని గోరంట్ల చెప్పారు. ఈ సందర్భంగా అక్కినేని సూపర్ హిట్ పాట ఆగదు ఆగదు అంటూ గోరంట్ల జగన్ పై సెటిల్ వేశారు. జీవో నెంబర్ ఒకటి తీసుకువచ్చిన జగన్ కోర్టులో మాడు పగులగొట్టించుకున్నారని గోరంట్ల ఎద్దేవా చేశారు.
19మంది గెలిచిన అభ్యర్థులకు మరోసారి టికెట్ ఇస్తామని గోరంట్ల చెప్పారు. ఈ విధంగా పార్టీ అధినేత చంద్రబాబు నాయుడు నిర్ణయించారని గోరంట్ల క్లారిటీనిచ్చారు. నాలుగేళ్లుగా వైసీపీకి బిజెపి మద్దతు ఇచ్చిందని, కానీ వైసీపీ అవినీతికి పాల్పడిన విషయం బిజెపికి ఇప్పుడు తెలిసి వచ్చిందని గోరంట్ల అన్నారు. విద్యుత్ చార్జీలు తగ్గిస్తామని జగన్ అధికారంలోకి వచ్చారని కానీ ఏడు సార్లు కరెంటు చార్జీలు పెంచడానికి జగన్ కి సిగ్గుందా అని గోరంట్ల ప్రశ్నించారు.
