సినీ హీరోగా అందరికి సుపరిచితుడైన విక్టరీ వెంకటేశ్.. రీల్ లైఫ్ అందరికి సుపరిచితమే కానీ.. రియల్ లైఫ్ మాత్రం ఆయన చాలా క్లోజ్డ్ గా ఉంటారు. ఆ మాటకు వస్తే.. ఆయన తోటి హీరోలు తన ఫ్యామిలీ లైఫ్ కు సంబంధించిన వివరాలతో ఇంటర్వ్యూలు ఇవ్వటం కనిపిస్తుంది. భార్య.. పిల్లల గురించి మీడియాలో ఆయన ఎక్కడా మాట్లాడటం కనిపించదు. అంతేనా.. వారితో కలిసి ఇంటర్వ్యూలు ఇవ్వరు. దీనికి తగ్గట్లే.. వారు సైతం తమ ప్రపంచంలోనే ఉంటారు. వెంకీ పిల్లలుగా తమ ఐడెంటిటీని రివీల్ చేసే ప్రయత్నం చేయరు.
అలాంటిది తాజాగా వెంకటేశ్ కుమార్తె వార్తల్లోకి వచ్చారు. ఎవరూ ఊహించని రీతిలో విజయం సాధించిన ఆమె.. తాజాగా విడుదల చేసిన ఒక జాబితాలో ఆమె పేరు రావటంతో ఒక్కసారిగా వార్తల్లోకి వ్యక్తిగా మారారు. వెంకీకి మొత్తం నలుగురు పిల్లలు. ముగ్గరు అమ్మాయిలు.. ఒక అబ్బాయి. అర్జున్ రామంత్.. ఆశ్రిత.. హయవాహిని.. భావన. ఇప్పుడు ఈ ప్రస్తావనకు కారణంగా ఆయన కుమార్తె ఆశ్రితనే. తాజాగా ఆమె ప్రముఖ సోషల్ మీడియా వేదికైన ఇన్ స్టాగ్రామ్ రిచ్ లిస్టులో ఆమె పేరు నమోదైంది.
ఆశ్రిత పలు రకాల వంటకాల్ని ఇట్టే చేసేస్తారు. తాను చేసిన వెరైటీ వంటకాల్ని ఆమె ఎప్పటికప్పుడు సోషల్ మీడియాలో షేర్ చేసుకుంటారు. ఆమెకు ఇన్ స్టాలో 13 లక్షలకు పైనే ఫాలోవర్స్ ఉన్నారు. ఇన్ఫినిటీ ప్లాటర్ అనే అకౌంట్ తో ఇన్ స్టాలో ఆమె యాక్టివ్ గా ఉంటారు. రెండేళ్ల క్రితం వినాయక రెడ్డిని వివాహం చేసుకున్న ఆమె.. ఇప్పుడు స్పెయిన్ లోని బార్సిలోనాలో సెటిల్ అయ్యారు.
తాజాగా హోపర్ డాల్ కం ఇన్ స్టాలో ఎక్కువగా సంపాదిస్తున్న సెలబ్రిటీల జాబితాను విడుదల చేశారు. అందులో ప్రపంచంలో అత్యధికంగా సంపాదిస్తున్న వారిలో హాలీవుడ్ నటుడు క్రిస్టియానో రోనాల్డో మొదటి స్థానంలో నిలిచారు. ఈ జాబితాలో భారత్ నుంచి టీమిండియా క్రికెట కెప్టెన్ విరాట్ కోహ్లీ.. బాలీవుడ్ నటి ప్రియాంక చోప్రా నిలిచారు. విరాట్ పోస్టు చేసే ఒక్కో ప్రమోషనల్ పోస్టుకు రూ.5 కోట్లకు పైనే రెమ్యున్ రేషన్.
ఇదే జాబితాలోఆశ్రిత పేరు ఉంది. ప్రపంచం వ్యాప్తంగా ఎక్కువగా సంపాదించే వారిలో ఆమె స్థానం 377గా నిలిచింది. ఆసియాలో చూస్తే ఆమె స్థానం 27 కావటం గమనార్హం. ఈ విభాగంలో అతి తక్కువ మంది భారతీయులకు మాత్రమే స్థానం లభించింది. అలా ఉన్న వారిలో ఆశ్రిత ఒకరు కావటం విశేషం. ఆమె పోస్టు చేసే ఒక్కో ప్రమోషనల్ పోస్టుకు 400 డాలర్లు.. అంటే మన రూపాయిల్లో చెప్పాలంటే దగ్గర దగ్గర రూ.29వేలు ఛార్జ్ చేస్తారని చెప్పాలి. తన ఖాతాలో బిస్కెట్లు.. కేకులు.. ఇతర స్నాక్ ఐటెమ్స్ తో పాటు పలు కొత్త రకాల్ని ఆమె పరిచయం చేస్తుంటారు. ఏమైనా భిన్నమైన ఫీల్డ్ లో తన సత్తా చాటిన ఆశ్రితను అభినందించాల్సిందే. ఈ సందర్భంగా అయిన వెంకటేశ్ తన కుమార్తె గురించి నాలుగు మాటలు చెబితే బాగుంటుందేమో!
