టాలీవుడ్ సీనియర్ స్టార్ హీరో వెంకటేష్, యంగ్ హీరో రానాల కాంబోలో రానా నాయుడు వెబ్ సిరీస్ తెరకెక్కిన సంగతి తెలిసిందే. బాబాయ్ తొలిసారిగా ఓ వెబ్ సిరీస్ లో నటిస్తుండడం, అందులో అబ్బాయ్ రానా పోటీపడి నటించడంతో ఈ వెబ్ సిరీస్ పై తీవ్ర ఆసక్తి ఏర్పడింది. ప్రయోగాలకు వెనుకాని బాబాయ్, అబ్బాయ్ లు చేసిన ఈ సరికొత్త ప్రయోగం కోసం తెలుగు ప్రేక్షకులు ఎదురుచూస్తున్నారు.
మునుపెన్నడూ చేయని క్యారెక్టర్ లో వెంకీమామ సందడి చేయబోతున్నారు. మార్చి 10న ఈ వెబ్ సిరీస్ ను నెట్ ఫ్లిక్స్ స్ట్రీమ్ చేయబోతున్నట్లుగా ప్రకటించింది. ఈ క్రమంలోనే ప్రమోషన్స్ జోరు పెంచిన ఓటీటీ జెయింట్…తాజాగా రానా నాయుడు తెలుగు ట్రైలర్ ను వదిలింది. ముంబై, బాలీవుడ్ బ్యాక్ డ్రాప్ లో సాగే ఈ ట్రైలర్ ఆకట్టుకుంటోంది. ముంబైలోని సెలబ్రిటీలు, బాలీవుడ్ బీ టౌన్ లో స్టార్ హీరోలు, హీరోయిన్లు, దర్శకనిర్మాతలకు వచ్చే సమస్యలను పరిష్కరించే ట్రబుల్ షూటర్ గా రానా కనిపించాడు.
ఆపదలో ఉన్నామని ఫోన్ చేయగానే.. క్షణాల్లో రంగంలోకి దిగిపోయి ఆ సమస్యను పరిష్కరించే పాత్రలో రానా నటించాడు. ఇక, జైలు శిక్ష అనుభవించి విడుదలైన ఖైదీగా వెంకీ కనిపించాడు. తండ్రి మీద ద్వేషంతో రగిలిపోయే పాత్రలో రానా అద్భుతంగా నటించాడు. ‘వాడొక పాము .. ఒక్క అవకాశం ఇచ్చినా నా ఫ్యామిలీని నాశనం చేస్తాడు’ అంటూ రానా చెప్పే డైలాగ్ ఈ ట్రైలర్ కే హైలైట్.
“నా జీవితంలో చెడు చేసినా .. మంచి చేసినా అది నా ఫ్యామిలీ కోసమే చేశాను. కాకపోతే కలిసున్నది తక్కువ .. విడిపోయింది ఎక్కువ” అనే వెంకీ మామ చెప్పే డైలాగ్ ఆ పాత్రలోని ఇంటెన్సిటీని రివీల్ చేసింది. ఏది ఏమైనా తండ్రీకొడుకులుగా బాబాయ్ అబ్బాయ్ ల మధ్య ఇంటెన్స్ సీన్లతో విడుదలైన ట్రైలర్ వైరల్ అయింది.
