మెగా ప్రిన్స్ వరుణ్ తేజ్ ఇటీవల విశాఖపట్నంలో నిర్వహించిన మట్కా రిలీజ్ ఈవెంట్ లో ఘాటు వ్యాఖ్యలు చేసిన సంగతి తెలిసిందే. `ఎప్పుడూ చిరంజీవి, పవన్ కళ్యాణ్ గురించే మాట్లాడతారా అని ఎవరో కామెంట్ చేశారు. నేను ఎవరి గురించి మాట్లాడాలో నా ఇష్టం. ఎంత ఎత్తుకు ఎదిగినా మూలాల‌ను మర్చిపోకూడదు. నువ్వు ఎక్కడ మొదలు పెట్టావు? ఎక్కడినుంచి వచ్చావు? నీ సపోర్ట్ ఎవరు? అన్నది మరిచిపోతే.. ఎంత సక్సెస్ అయినా అది ఎందుకు పనికిరాదు` అంటూ వరుణ్ నోరు జారాడు.
అల్లు అర్జున్ ను ఉద్దేశించే వరుణ్ అటువంటి కామెంట్స్ చేశాడని రెండు రోజులు సోషల్ మీడియాలో పెద్ద ఎత్తున చర్చ జరిగింది. అయితే వరుణ్ కామెంట్స్ ను సీరియస్ గా తీసుకున్న బన్నీ ఫాన్స్.. ఇప్పుడు మెగా ప్రిన్స్ కి చుక్కలు చూపిస్తున్నారు. వరుణ్ యాక్ట్‌ చేసిన మట్కా చిత్రం భారీ అంచనాల నడుమ నవంబర్ 14న విడుదలైంది. కరుణ కుమార్ డైరెక్ట్ చేసిన ఈ చిత్రం తొలి ఆట నుంచే నెగటివ్ టాక్ ను మూటగ‌ట్టుకుంది.
సినిమాలో గెటప్స్ తప్ప కంటెంట్ లేదని సగటు ప్రేక్షకుడు కూడా అభిప్రాయపడ్డాడు. మట్కాతో వరుణ్ తేజ్ ఖాతాలో మరో ఫ్లాప్ పడింది. దీంతో బన్నీ ఫాన్స్ రంగంలోకి దిగారు. మట్కా పరాజయంతో వరుణ్ తేజ్‌ను ఆడుకోవ‌డం స్టార్ట్ చేశారు. ప‌నిగ‌ట్టుకుని మ‌రీ వరుణ్ గ‌త చిత్రాల రిజ‌ల్ట్‌, క‌లెక్ష‌న్స్ ను సోషల్ మీడియాలో ట్రెండ్ చేస్తున్నారు. వరుణ్ తేజ్ సినిమాలు సాధించిన మొత్తం క‌లెక్ష‌న్స్ బన్నీ సినిమా తొలి రోజు వ‌సూళ్ల‌కంటే త‌క్కువంటూ ఎద్దేవ చేస్తున్నారు. మా హీరోకు కౌంట‌ర్స్ త‌ర్వాత ఇవ్వొచ్చు.. ముందు హిట్ కొట్టి చూపించు అంటూ వరుణ్ కు బన్నీ ఫ్యాన్స్ హిత‌వు ప‌లుకుతున్నారు. అస‌లే మట్కా ఫ్లాప్ తో బాధ‌లో ఉన్న వరుణ్ తేజ్ కు బన్నీ ఫ్యాన్స్ మ‌రింత త‌ల‌నొప్పిగా మారారు.
