మొండోడు రాజు కంటే బలవంతుడన్నసామెత మనకు తెలిసిందే. మరి.. మొండోడే రాజు అయితే.. ఇతగాడి హద్దేముంది. ప్రపంచానికి పెద్దన్న అమెరికాకు రెండోసారి అధ్యక్షుడైన డొనాల్డ్ ట్రంప్.. ముందు వెనుకా అన్నది చూసుకోకుండా తనకు నచ్చింది నచ్చినట్లుగా చేసుకుంటూ పోతున్నారు. ఎవరేం అనుకుంటారన్నది ఆయన పట్టించుకోవటం లేదు.
ఎవరి అభ్యంతరాల్ని లెక్క చేయట్లేదు. తన ఎజెండాను తాను చేసుకుంటూ పోవటమే తన లక్ష్యమన్నట్లుగా ఆయన తీరు ఉంది. అధ్యక్షుడిగా ప్రమాణస్వీకారం చేస్తున్న వేళలో.. గల్ఫ్ ఆఫ్ మెక్సికోను గల్ఫ్ ఆఫ్ అమెరికాగా మారుస్తానని వ్యాఖ్యానించటం.. దానికి అక్కడే ఉన్న హిల్లరీ క్లింటన్ ఫక్కున నవ్వటం తెలిసిందే.
మాటలకు చెప్పటమే కానీ చేతల్లో ఇలా పేరు మార్చటం మామూలు విషయం కాదన్న విశ్లేషనలు బోలెడన్ని వస్తున్నప్పటికీ.. వాటిని పట్టించుకోని ట్రంప్ తాను అనుకున్నది అనుకున్నట్లు చేసేశారు. గల్ఫ్ ఆఫ్ మెక్సికో పేరును గల్ఫ్ ఆఫ్ అమెరికా మారుస్తూ ఒక ఎగ్జిక్యూటివ్ ఆర్డర్ ఇచ్చి పారేశారు. అమెరికా ఆర్థిక వ్యవస్థకు గల్ప్ ఆఫ్ మెక్సికో కీలకం. ఇది ప్రపంచంలోనే అతి పెద్ద గల్ప్ గా అభివర్ణిస్తారు.
సముద్రంలో చమురు ఉత్పత్తి చేసే క్షేత్రాల్లో ప్రపంచంలోనే అతి పెద్దది గల్ప్ ఆఫ్ మెక్సికో. అమెరికా ముడి చమురు ఉత్పత్తిలో 14 శాతం .. 5 శాతం సహజవాయువు ఉత్పత్తి ఇక్కడి నుంచే జరుగుతోంది. అమెరికాలో వినియోగించే 40 శాతం మత్స్య సంపద ఇక్కడే లభిస్తోంది. గల్ప్ ఆఫ్ మెక్సికో అన్నది 16 లక్షల చదరపుకిలోమీటర్ల మేర విస్తరించి ఉంది. ఇది అట్లాంటిక్ మహా సముద్రం.. కరేబియన్ సముద్రం.. తూర్పు మెక్సికో.. ఆగ్నేయ అమెరికా.. పశ్చిమ క్యూబా మధ్య ున్నఒక సముద్ర ప్రాంతంగా చెప్పొచ్చు.
ఈ గల్ప్ ఆఫ్ మెక్సికో చుట్టూ మెక్సికోకు చెందిన టమౌలిపస్.. టబస్కో.. కాంపెచే.. యుక్తాన్.. వెరక్రుజ్ రాష్ట్రాలు ఉన్నాయి. గల్ప్ ఆఫ్ మెక్సికోకు సంబంధించి అమెరికా – మెక్సికో, అమెరికా – క్యూబా, మెక్సికో – క్యూబాల మధ్య సముద్ర సరిహద్దులకు సంబంధించి ఐక్యరాజ్య సమితి తదితర అంతర్జాతీయ సంస్థల సమక్షంలో కొన్ని ఒప్పందాలు జరిగాయి. గల్ప్ ఆఫ్ మెక్సికోలో మిస్సిస్సిపీ.. రియో గ్రాండే నదులు ప్రవహిస్తున్నాయి.
ట్రంప్ పేరు మారుస్తూ నిర్ణయం తీసుకున్న తర్వాత.. దీనికి సంబంధించిన ఎన్నో అంశాల్ని సాంకేతికంగా అప్డేట్ చేయాల్సి ఉంటుంది. ఇందుకు యావత్ ప్రపంచం అంగీకరించాల్సి ఉంటుంది. మరి.. ఇంత తలనొప్పిని ప్రపంచం మీద ఇట్టే రుద్దేసిన ట్రంప్ తీరుకు ఎలాంటి స్పందన వ్యక్తమవుతుందన్నది ఇప్పుడు ప్రశ్న.
ఇప్పుడీ పేరు అంశాన్ని తెర మీదకు తెచ్చిన ట్రంప్.. గడిచిన 400 ఏళ్లుగా ఇప్పుడున్న పేరునే పిలుస్తున్నారు. అలాంటప్పుడు రాత్రికి రాత్రి ఆయన ఇచ్చి పారేసిన ఎగ్జిక్యూటివ్ ఆర్డర్ తో అంతా అయిపోతుందా? అన్నది ఒక ప్రశ్న. అమెరికా చట్టసభ ఆమోదం లేకుండా కేంద్ర ప్రభుత్వానికి అధ్యక్షుడు చేసే లిఖిత పూర్వక ఆదేశాల్ని ఎగ్జిక్యూటివ్ ఆర్డర్ గా పేర్కొంటారు. ప్రభుత్వ విధానాలకు సంబంధించి అధ్యక్షుల వారు తీసుకునే కీలక నిర్ణయాలు ఇందులో ఉంటాయి.
ఈ ఆదేశాలకు చట్టబద్ధత ఉన్నప్పటికీ.. పలు సందర్భాల్లో కోర్టులను ఆశ్రయించొచ్చు.
అమెరికా అధ్యక్షుడు జారీ చేసిన ఎగ్జిక్యూటివ్ ఆర్డర్ లను తిరస్కరించేందుకు.. చట్టాన్ని తీసుకొచ్చే అవకాశం కాంగ్రెస్ కు ఉన్నప్పటికీ దానిపై వీటో అధికారం మాతరం అధ్యక్షుడిదే. అందుకే కాంగ్రెస్ ఆమోదించలేని అంశాల్ని తమ ఎజెండాలో అధ్యక్షుల వారు పెట్టుకుంటూ ఉంటారు.
ఒకసారి అధ్యక్షుడు డిసైడ్ అయ్యాక వాటిని వ్యతిరేకించే అవకాశం లేనప్పటికీ.. ఆ నిర్ణయాల అమలుకు అవసరమైన నిధులు ఇవ్వకుండా అడ్డుకోవటం.. ఇతర అడ్డంకుల్ని క్రియేట్ చేయటం ద్వారా దీని అమలుకు కాంగ్రెస్ ఆటంకం కలిగించే వీలుంది. ఈ పేరు మార్పు ఎపిసోడ్ మీద ఏం జరుగుతుందో చూడాలి.