మెగా కాంపౌండ్ నుంచి తెరంగేట్రం చేస్తోన్న వైష్ణవ్ తేజ్ తొలి చిత్రం ఉప్పెన ఈ నెల 12న విడుదల కాబోతోంది. వైష్ణవ్ తేజ్, కృతి శెట్టిలే జంటగా నటిస్తున్న ఈ చిత్రం ట్రైలర్ విడుదలైంది. యంగ్ టైగర్ జూనియర్ ఎన్టీఆర్ చేతుల మీదుగా విడుదలైన ఈ చిత్ర ట్రైలర్ ఆకట్టుకుంటోంది. సముద్ర తీరం, జాలర్ల నేపథ్యంలో సాగే ప్రేమకథగా ఉప్పెన తెరకెక్కింది. గొప్పింటి అమ్మాయిని ప్రేమించిన యువకుడిగా వైష్ణవ్ తేజ్…. పరువు కోసం తన కూతురి ప్రేమను అడ్డుకునే తండ్రిగా తమిళ నటుడు విజయ్ సేతుపతి గంభీరంగా నటించారు. పరువు కోసం ప్రాణాలిచ్చే తండ్రిగా తొలిసారి ఓ తెలుగు చిత్రంలో నటిస్తున్న విజయ్ సేతుపతి… విలన్ గా ఆకట్టుకున్నారు. తన కూతురిని ప్రేమించిన యువకుడిపై, అతడి ఊరిపై తన పగని ప్రదర్శించే పాత్రలో విజయ్ సేతుపతి జీవించాడు.
‘‘ప్రేమ గొప్పదైతే చరిత్రలోని, సమాధుల్లోని కనపడాలి కానీ.. పెళ్లిచేసుకుని, పిల్లల్ని కని, ఇళ్లల్లో కనబడితే దాని విలువ తగ్గిపోదూ. అందుకే, ప్రేమ ఎప్పుడూ చరిత్రలోనే ఉంటది. దానికి భవిష్యత్తు ఉండదు. ఏటి!’’ అంటూ విజయ్ సేతుపతి చెప్పే డైలాగ్ ట్రైలర్‌కే హైలైట్. దేవి శ్రీ ప్రసాద్ సంగీతం అందించిన ఈ చిత్రంలోని ‘నీ కన్ను నీలి సముద్రం’ అనే పాట వైరల్ అయిన సంగతి తెలిసిందే. తాజాగా విడుదలైన ట్రైలర్ కు కూడా మంచి రెస్పాన్స్ వస్తోంది. బుచ్చిబాబు సానా దర్శకుడిగా పరిచయం అవుతోన్న ‘ఉప్పెన’ను సుకుమార్ రైటింగ్స్ భాగ‌స్వామ్యంతో మైత్రీ మూవీ మేక‌ర్స్ బ్యానర్‌పై నవీన్ యెర్నేని, వై.రవిశంకర్ నిర్మించారు. ఈ చిత్రాన్ని ఫిబ్రవరి 12న ప్రేక్షకుల ముందుకు తీసుకొస్తున్నారు.
