నందమూరి నటసింహం బాలకృష్ణ తొలిసారిగా హోస్ట్ గా వ్యవహరిస్తున్న టాక్ షో ‘అన్ స్టాపబుల్ విత్ ఎన్బీకే’ తెలుగు ఓటీటీ ‘ఆహా’ కు కొత్త జోష్ ఇచ్చిన సంగతి తెలిసిందే. మాస్ కా బాప్ బాలయ్య వ్యాఖ్యాతగా ఉన్న ఈ షో బాప్ ఆఫ్ ఆల్ టాక్ షోస్ గా దూసుకుపోతోంది. ఈ షోలో తన నటనతో, ప్రశ్నలతో బాలయ్య తోటి తారలను ఇంటర్వ్యూ చేసే విధానం ప్రేక్షకులను కట్టిపడేసింది. ఈ క్రమంలోనే బాలయ్య టాక్ షో మరో అరుదైన ఘనతను దక్కించుకుంది.
IMDBలోని టాప్ 10 రియాలిటీ టీవీ షోల జాబితాలో ఈ షోకు 5వ స్థానం దక్కింది. ఒక తెలుగు టాక్ షోకు ఇటువంటి అరదైన గౌరవం దక్కడం బహుశా ఇదే తొలిసారి. ఈ షో దీపావళికి మొదలై తొలి సీజన్‌లో భాగంగా మొత్తం 10 ఎపిసోడ్ ల షూటింగ్ ను కంప్లీట్ చేసుకుంది. సూపర్ స్టార్ మహేష్ బాబుతో బాలయ్య చిట్ చాట్ చివరి ఎపిసోడ్ గా టెలికాస్ట్ కానుంది.
మొదటి సీజన్ ను బాలయ్య ఓ రేంజ్ కు తీసుకువెళ్లడంతో సెకండ్ సీజన్‌పై మరింత ఆసక్తి ఏర్పడింది. దీంతో, రెండో సీజన్ షూటింగ్ ను వీలైనంత త్వరగా మొదలుపెట్టాలని అల్లు అరవింద్ ప్లాన్ చేస్తున్నారట. ఇప్పటికే అఖండ అద్భుత విజయాన్ని అందుకున్న బాలయ్య….తాజాగా మరో అరుదైన ఘనతను దక్కించుకోవడంతో ఇటు నందమూరి అభిమానులు,అటు టీడీపీ అభిమానులు ఫుల్ జోష్ లో ఉన్నారు.
