ఏపీలో ఎగ్జిట్ పోల్స్ విడుదలైన నేపథ్యంలో రాజకీయ వాతావరణం ఒక్కసారిగా వేడెక్కింది. కేంద్రంతో పాటు ఏపీలో కూడా ఎన్డీఏ కూటమి గెలుపు ఖాయమని మెజారిటీ సర్వేలు తేల్చి చెప్పడంతో టీడీపీ, జనసేన, బీజేపీ శ్రేణులు జోష్ లో ఉన్నాయి. ఈ క్రమంలోనే ఉండవల్లి చేరుకున్న టీడీపీ అధినేత చంద్రబాబుకు పార్టీ శ్రేణులు ఘన స్వాగతం పలికాయి. గన్నవరం విమానాశ్రయం చంద్రబాబును చూసిన టీడీపీ కార్యకర్తలు సీఎం…సీఎం..అంటూ నినాదాలతో హోరెత్తించారు.
విదేశీ పర్యటన ముగించుకున్న చంద్రబాబు హైదరాబాద్ నుంచి ఉండవల్లిలోని నివాసానికి తిరిగి వచ్చారు. ఈ క్రమంలోనే గన్నవరం ఎయిర్ పోర్టులో చంద్రబాబుకు ఘన స్వాగతం లభించింది. కొల్లు రవీంద్ర, దేవినేని ఉమా, యార్లగడ్డ వెంకట్రావు, కాగిత కృష్ణప్రసాద్, బోడె ప్రసాద్ తదితరులు విమానాశ్రయం దగ్గర చంద్రబాబుకు స్వాగతం పలికారు. ఎగ్జిట్ పోల్స్ ఇచ్చిన కిక్కుతో టీడీపీ ప్రధాన కార్యాలయం ఎన్టీఆర్ ను భవన్ ను రంగురంగుల విద్యుత్ దీపాలతో అందంగా ముస్తాబు చేశారు.
