హాలీవుడ్ దర్శక దిగ్గజం స్టీవెన్ స్టీల్ బర్గ్ గురించి ప్రపంచవ్యాప్తంగా ఉన్న సినీ ప్రేమికులకు పరిచయం అక్కర్లేదు. హాలీవుడ్ లో ఎన్నో చరిత్రాత్మకు సినిమాలు తీసిన ఘనత ఆయనది. అందుకే ప్రపంచవ్యాప్తంగా ఉన్న దర్శకులంతా జీవితంలో ఒక్కసారైనా ఆయనను కలవాలని అనుకుంటారు. అటువంటిది స్పీల్ బర్గ్ ను కలవడమే కాకుండా ఆయన దగ్గర నుంచి ప్రశంసలు కూడా అందుకుంటే ఇక ఆ దర్శకుడి ఆనందానికి ఆకాశమే హద్దు.ప్రస్తుతం అటువంటి అరుదైన అవకాశాన్ని, ఆనందాన్ని టాలీవుడ్ దర్శక ధీరుడు ఎస్.ఎస్ రాజమౌళి అనుభూతి చెందారు.
గోల్డెన్ గ్లోబ్ అవార్డుల తర్వాత జరిగిన యూనివర్సల్ పార్టీలో స్టీవెన్ స్పీల్ బర్గ్ ను కలిసే గోల్డెన్ ఛాన్స్ ను జక్కన్న కొట్టేశారు. రాజమౌళితో పాటు కీరవాణి కూడా స్పీల్ బర్గ్ ను కలిసి మాట్లాడారు. ఇప్పుడే దేవుడిని కలిశానంటూ రాజమౌళి ఎంతో ఎమోషనల్ గా ట్వీట్ చేశారు. స్పీల్ బర్గ్ సినిమాలంటే తనకి ఎంతో ఇష్టమని ఆయనతో చెప్పానని కీరవాణి అన్నారు. అయితే, నాటు నాటు పాట తనకు ఎంతో నచ్చిందని స్టీల్ బర్గ్ చెప్పారని, ఆ మాటను తాను ఇంకా నమ్మలేకపోతున్నానని కీరవాణి అన్నారు.
అంతేకాదు స్పీల్ బర్గ్ తో కలిసి దిగిన ఫోటోలను రాజమౌళి తన ట్విట్టర్ ఖాతాలో షేర్ చేశారు. దీంతో ప్రస్తుతం ఈ ఫోటోలు సోషల్ మీడియాలో వైరల్ గా మారాయి. తెలుగు చలన చిత్ర పరిశ్రమతో పాటు యావత్ భారతీయ సినీ పరిశ్రమ గర్వించదగ్గ దర్శకుడు రాజమౌళి, ప్రపంచ సినీ పరిశ్రమ గర్వించదగ్గ దిగ్గజ దర్శకుడు స్పీల్ బర్గ్ ఓకే ఫ్రేమ్ లో ఉండడంతో రాజమౌళి ఫ్యాన్స్ హర్షం వ్యక్తం చేస్తున్నారు.
