టాలీవుడ్ సినిమాల్లో విలన్ గా, క్యారెక్టర్ ఆర్టిస్ట్ గా సంపత్ రాజ్ కు మంచి గుర్తింపు ఉన్న సంగతి తెలిసిందే. మిర్చి సినిమాలో విలన్ గా తనదైన ముద్ర వేసిన సంపత్ ఆ తర్వాత చాలా చిత్రాల్లో కీలక పాత్రలు పోషించి మెప్పించారు. తెలుగుతో పాటు తమిళ, కన్నడ, మలయాళ భాషల్లోనూ నటుడిగా మంచి పేరు తెచ్చుకున్నారు. ఈ క్రమంలోనే సంపత్…టాలీవుడ్ ప్రముఖ దర్శకుడు త్రివిక్రమ్ కు వార్నింగ్ ఇచ్చారట. ఓ టీవీ షోలో పాల్గొన్న సంపత్ ఈ విషయాన్ని స్వయంగా వెల్లడించారు.
తాజాగా అలీతో సరదాగా కార్యక్రమంలో పాల్గొన్న సంపత్ తన కెరీర్ గురించి అనేక విషయాలు పంచుకున్నారు. ఈ షోలో భాగంగా సంపత్ ను అలీ ఓ ప్రశ్న అడిగారు. ‘ఆ మధ్య త్రివిక్రమ్ ను బెదిరించారట’ అని అలీ సెటైరికల్ గా అడిగిన ప్రశ్నకు సంపత్ కూడా సెటైరికల్ గా రిప్లై ఇచ్చారు. తన సినిమాలో ఓ రోల్ ఇస్తానని చెప్పిన త్రివిక్రమ్ …ఆ తర్వాత చాన్స్ ఇవ్వలేదని, అందుకే ఆయనను బెదిరించానని సంపత్ చెప్పుకొచ్చారు.
అందుకే, ఈ సారి త్రివిక్రమ్ సినిమాలో రోల్ ఇవ్వకుంటే షూటింగ్ లొకేషన్ కు వెళ్లి కెమెరా ఎత్తుకొచ్చేస్తానని సరదాగా వార్నింగ్ ఇచ్చానని సంపత్ అన్నారు. తెలుగులో తన అభిమాన దర్శకులలో త్రివిక్రమ్ ఒకరని, ఆయన డైరెక్షన్ అంటే తనకు చాలా ఇష్టమని సంపత్ చెప్పారు. అందుకే, ఆయన సినిమాలలో చేయాలని తనకు ఎంతో ఉత్సాహంగా ఉండేదని చెప్పుకొచ్చారు. ఒక సినిమాలో చిన్న రోల్ ఉందని త్రివిక్రమ్ చెప్పగానే…తన పాత్ర ఏమిటని కూడా అడక్కుండా ఓకే అనేశానని, మరోసారి పెద్ద రోల్ ఇస్తానని అపుడు త్రివిక్రమ్ ప్రామిస్ చేశారని గుర్తు చేసుకున్నారు.
అయితే, ఆ తరువాత చాలా సినిమాలు చేసిన త్రివిక్రమ్….తనకు మాత్రం పెద్ద రోల్ ఇవ్వలేదని, అందుకే ఈ సారి తనను తీసుకోకుండా సినిమా చేయడానికి ప్రయత్నిస్తే మాత్రం, లొకేషన్ కి వచ్చి కెమెరా తీసుకుని వెళ్లిపోతానని త్రివిక్రమ్ కే చెప్పానని అన్నారను. ఇప్పుడు త్రివిక్రమ్ ఒక సినిమా తీస్తున్నట్టుగా తెలిసిందని, ఒకటి రెండు వారాల్లో వెళ్లి ఆ సినిమాలో వేషం అడుగుతానని, ఇవ్వకుంటే తన మాటను నిలబెట్టుకుంటానని జోక్ చేశారు సంపత్.
