టాలీవుడ్ దర్శక ధీరుడు రాజమౌళి తెరకెక్కిస్తోన్న ‘ఆర్ఆర్ఆర్’ చిత్రంపై భారీ అంచనాలున్న సంగతి తెలిసిందే. జక్కన్న చెక్కుతోన్న ఈ పాన్ ఇండియా మూవీ కోసం దేశవ్యాప్తంగా సినీ అభిమానులు ఆతృతగా ఎదురుచూస్తున్నారు. మెగా పవర్ స్టార్ రామ్ చరణ్, యంగ్ టైగర్ జూనియర్ ఎన్టీఆర్ వంటి స్టార్ హీరోలతో పాటు బాలీవుడ్ సీనియర్ హీరో అజయ్ దేవ్ గన్, బాలీవుడ్ బ్యూటీ ఆలియా భట్ నటిస్తోన్న ఈ భారీ మల్టీస్టారర్ మరో బాహుబలి కానుందని అంచనాలున్నాయి.
ఆ అంచనాలకు తగ్గట్టుగానే ‘ఆర్ఆర్ఆర్’ కోసం ప్రేక్షకులు, రాజమౌళి అభిమానులు ఎంతో ఆతృతగా ఎదురుచూస్తున్నారు. ఇప్పటికే ఈ చిత్రం నుంచి తారక్, చెర్రీల ల లుక్ వైరల్ అయింది. ఈ క్రమంలోనే తాజాగా చిత్ర బృందం ‘రోర్ ఆఫ్ ఆర్ఆర్ఆర్’ పేరుతో ఓ మేకింగ్ వీడియో రిలీజ్ చేసింది. ఈ చిత్రం కోసం జక్కన్న అండ్ టీం పడుతోన్న కష్టమంతా ఈ మేకింగ్ వీడియోలో కనిపించింది. ఒకటికి రెండు టేక్ లు తీసి మరీ అద్భుతమైన ఔట్ పుట్ కోసం రాజమౌళి అండ్ టీం ఎంతో శ్రమిస్తోంది.
ఈ మేకింగ్ వీడియోలోని సీన్స్, ఫైట్స్ రాజమౌళి ఫ్యాన్స్ కు గూస్ బంప్స్ తెప్పిస్తాయనడంలో సందేహం లేదు. ఇక, ఈ చిత్రానికి కీరవాణి ఇచ్చిన బ్యాక్ గ్రౌండ్ మ్యూజిక్ ఓ రేంజ్ లో ఉంది. ఇప్పటి వరకు వచ్చిన ప్రోమో, టీజర్స్ సినిమాపై అంచనాలు పెంచగా..తాజా మేకింగ్ వీడియో ఆ అంచనాలను మరింత పెంచింది. అయితే, కరోనా నేపథ్యంలో ఈ చిత్ర విడుదల తేదీపై క్లారిటీ లేదు. అయితే, తాజాగా విడుదల చేసిన మేకింగ్ వీడియోలో రిలీజ్ డేట్ పై క్లారిటీ ఇచ్చింది చిత్ర టీం. అనుకున్నట్టుగానే అక్టోబర్ 13న ‘ఆర్ఆర్ఆర్’ సినిమాను థియేటర్లలో రిలీజ్ చేయనున్నామని అధికారికంగా ప్రకటించింది.
