టాలీవుడ్ లో మెగాస్టార్ చిరంజీవి తనయుడిగా అడుగుపెట్టిన రామ్ చరణ్…అనతికాలంలోనే తనకంటూ ఓ ప్రత్యేకమైన గుర్తింపు తెచ్చుకున్నాడు. చిరుతతో తెరంగేట్రం చేసిన చరణ్ మగధీర చిత్రంతో స్టార్ హీరో ఇమేజ్ ను దక్కించుకున్నాడు. ఆ తర్వాత విభిన్న చిత్రాలు..ప్రయోగాత్మక కథలతో కెరీర్ లో ఎత్తుపల్లాలను చూసిన చరణ్…రంగస్థలంతో బ్లాక్ బస్టర్ హిట్ కొట్టి సక్సెస్ ట్రాక్ లో పడ్డాడు.
ఇక, దర్శక ధీరుడు జక్కన్నడైరెక్షన్ లో యంగ్ టైగర్ ఎన్టీఆర్ తో కలిసి ఆర్ఆర్ఆర్ వంటి భారీ మల్టీ స్టారర్ చిత్రంతో త్వరలో ప్రేక్షకుల ముందుకు రాబోతున్నాడు. ఇప్పటికే విడుదలైన ప్రోమోల్లో అల్లూరి సీతారామరాజుగా చెర్రీ పవర్ ఫుల్ పాత్రలో ఆకట్టుకున్నాడు. ఈ క్రమంలోనే ఈ రోజు చెర్రీ పుట్టినరోజును మెగా ఫ్యాన్స్ పండుగలా జరుపుకుంటున్నారు. ఈ నేపథ్యంలోనే రామ్ చరణ్ కు మరో అరుదైన గౌరవం దక్కింది.
న్యూయార్క్ లోని టైమ్స్ స్క్వేర్ దగ్గర అమెరికా స్టాక్ మార్కెట్ నాస్డాక్ భవంతి బిల్ బోర్డుపై చెర్రీ ఫొటోల స్లైడ్ షో ప్రదర్శించారు. చరణ్ పుట్టినరోజు సందర్భంగా ఈ స్లైడ్ షో వేశారని, ఇదొక మధురమైన అనుభూతి అని ఉపాసన ట్వీట్ చేశారు. ఆ ఫొటోలు చూస్తుంటే అద్భుతంగా అనిపిస్తోందని, ఇంతటి ప్రేమాభిమానాలకు కృతజ్ఞతలు అని చెప్పారు. టైమ్స్ స్క్వేర్ పై ఈ ఘనత సాధించిన తొలి దక్షిణాది నటుడు చరణ్ కావడం విశేషం.
కాగా, ఇండస్ట్రీలోని యంగ్ హీరోలలో రామ్ చరణ్, జూనియర్ ఎన్టీఆర్ ల మధ్య మంచి స్నేహబంధం ఉంది. ఈ ఇద్దరు బెస్ట్ ఫ్రెండ్స్ కలిసి ఆర్ఆర్ఆర్ లో రామ్, భీమ్ లుగా పోటీపడి నటిస్తున్నారు. ఈ క్రమంలోనే చరణ్ పుట్టినరోజు సందర్భంగా తారక్ శుభాకాంక్షలు తెలుపుతూ ట్వీట్ చేశాడు. “ఈ ఏడాది మాకు చిరస్మరణీయం కానుంది. సోదరా… నీతో గడిపిన క్షణాలు ఎల్లప్పటికీ నిలిచిపోతాయి” అని తారక్ ట్వీట్ చేశాడు.
