‘నూటికి నూరు శాతం ఫలితం రావాలి’ అన్న మాట చాలామంది నోటి నుంచి వినిపిస్తుంటుంది. అయితే.. టాలీవుడ్ దర్శక ధీరుడు జక్కన్న అలియాస్ రాజమౌళి మాత్రం.. తాను చేసే ప్రతి సినిమాను నూటికి నూరుశాతం అన్నట్లుగా తెరకెక్కిస్తుంటాడు. ఈ పనితనమే మిగిలిన వారికి భిన్నంగా ఆయన్ను నిలపటమే కాదు.. తెలుగు సినిమాను ఎక్కడికో తీసుకెళ్లిందని చెప్పాలి.
రాజమౌళిలో ఉన్న మరో మంచి గుణం ఏమంటే.. టాలెంట్ ను ప్రోత్సహిస్తాడు. ఎంతో మంది కొత్త వారికి తన నోటి నుంచి వచ్చే పొగడ్తతో వారికి అంతులేని ఆనందాన్ని ఇస్తుంటారు. ఎవరి విషయంలో అయినా ఆయన ఏదైనా మాట చెబితే అది నూటికి నూరు శాతం అన్నట్లుగా ఉంటుంది.
కొన్ని సినిమాల గురించి.. కొందరు నటీనటుల గురించి ఆయన అప్పుడప్పుడు ఓపెన్ గా చెప్పేస్తుంటారు. తాజాగా అలాంటిదే చోటు చేసుకుంది. ఒక కుర్ర హీరోకు తాను జీవితంలో మర్చిపోలేనంత భారీ పొగడ్తను చేశారు జక్కన్న. ఇంతకీ ఆ అదృష్టాన్ని సొంతం చేసుకున్న కుర్ర హీరో శ్రీవిష్ణు.
అతడి గురించి చెప్పిన రాజమౌళి.. ప్రత్యేక జోనర్ లో నటించేందుకు ఉన్న ఏకైక తెలుగు హీరో అంటూ పొగిడేశారు. ఇంతకీ ఎవరిలో లేని ప్రత్యేక జోనర్ శ్రీవిష్ణులో ఏముందన్నది రాజమౌళి మాటల్లోనే చూస్తే.. ‘‘పక్కింటి కుర్రాడిలా ఉంటాడు. ఒక చేప నీటిలోకి ఎంత ఈజీగా వెళ్లగలదో.. శ్రీవిష్ణు మాస్ హీరో పాత్రలోకి అలా వెళ్లగలడు.
అంత ఈజీగా మాస్ క్యారెక్టర్ లోకి వెళ్లగలడని మనం ఊహించలేం. ఇంతకు ముందు మాస్ పాత్రల్ని శ్రీవిష్ణు చేశాడు. తాజాగా అతడు చేసిన భళా తందాన లో మొదట్లో మామూలుగా కనిపించి.. తర్వాత చాలా ఈజీగా మాస్ హీరోలా ట్రాన్స్ ఫార్మ్ అవుతాడు. ఈ తరహా జానర్ లో ఉన్న ఏకైక తెలుగు హీరో అతడే’ అంటూ ప్రశంసల వర్షం కురిపించారు.
రాజమౌళి లాంటి దర్శకుడి నోటి నుంచి బాగుందన్న మాటే గొప్పగా ఫీలయ్యే వారికి.. ఇంత భారీ పొగడ్త జక్కన్న నోటి నుంచి వచ్చిన తర్వాత శ్రీవిష్ణు ఆనందం ఎంతన్నది ప్రత్యేకంగా చెప్పాల్సిన అవసరమే ఉండదేమో? శ్రీవిష్ణు.. కేథరిన్ హీరో హీరోయిన్లుగా నటించిన భళా తందానాన చిత్రం ఈ శుక్రవారం విడుదల కానుంది. ఈ సినిమా ప్రీ రిలీజ్ ఈవెంట్ ను నిర్వహించారు. ఈ సందర్భంగా శ్రీవిష్ణుకు మర్చిపోలేని పొగడ్తను ఇచ్చేశారు జక్కన్న. మరి.. సినిమా ఎలా ఉందన్నది తేలాలంటే.. మరో రెండు రోజులు వెయిట్ చేస్తే సరిపోతుంది.
