మన దేశంలో క్రికెటర్లకు, సినీ తారలకు, కొంతమంది పొలిటిషియన్లకు వీరాభిమానులుంటారు. వారందరినీ ఆ హార్డ్ కోర్ అభిమానులు డెమీగాడ్స్ గా కొలుస్తుంటారు. అందుకే, తమ అభిమాన హీరోపై పల్లెత్తు మాట పడకుండా చూసుకునే ఆ ఫ్యాన్స్…సమయం సందర్భాన్ని బట్టి తమ అభిమానాన్ని వ్యక్తం చేస్తుంటారు. అయితే, ఇదే కోవలో ప్రభాస్ అభిమాని ఒకరు…తన అభిమానాన్ని చూపించే క్రమంలో ప్రాణాలు వదలడం కలకలం రేపింది.
యూవీ క్రియేషన్స్ తెరకెక్కిస్తోన్న రాధేశ్యామ్ సినిమా అప్డేట్ కోసం వేచి చూసి విసిగిపోయానని, అందుకే సూసైడ్ చేసుకుంటున్నానని ఆ అభిమాని రాసిన సూసైడ్ నోట్ ఇపుడు సోషల్ మీడియాలో వైరల్ అయింది. యూవీ క్రియేషన్స్, రాధే శ్యామ్ చిత్ర డైెరెక్టర్ తన చావుకి కారణమని చెబుతూ సదరు నిర్మాణ సంస్థను, ప్రభాస్ ను ట్యాగ్ చేస్తూ సూసైట్ నోట్ ను ట్వీట్ చేశాడు. ఇది ఒక రెబెల్ స్టార్ ఫ్యాన్ లెటర్ అని, ప్రతీ రెబెల్ స్టార్ ఆవేదన ఇది అని అర్ధం చేసుకోవాలని కోరారు.
“ఇంతవరకు ఒక్క లెటర్ కూడా రాయని నేను సూసైడ్ నోట్ రాస్తానని కలలో కూడా ఊహించలేదు. మీరు అప్డేట్స్ ఇవ్వకపోవడం వల్ల రాయక తప్పడం లేదు. కనీసం నా చావు చూసైనా ‘రాధేశ్యామ్’ అప్డేట్ ఇస్తారని అనుకొంటున్నాను. చాలా రోజులు వేచి చూసేలా చేశారు. మేము వెయిట్ చేశాం. ఇక చాలు సార్. నా చావుకి కారణం యూవీ క్రియేషన్స్ టీమ్, డైరెక్టర్ రాధాకృష్ణ మాత్రమే. ఈ యూనిట్‌కు చిన్న మనవి.. ఫ్యాన్స్ ఎమోషన్స్‌తో ఆడుకోవద్దు.. ఇట్లు.. రెబెల్ స్టార్ ఫ్యాన్” అని ఆ లెటర్ లో ఉంది.
సాహో తర్వాత ప్రభాస్ నటిస్తోన్న రాధేశ్యామ్ నుంచి వరుస అప్డేట్స్ కోసం ఫ్యాన్స్ ఆశిస్తున్నారు. కానీ, గత వారం రోజులుగా కనీసం సినిమా నుంచి ఒక్క పోస్టర్ కూడా విడుదల కాలేదు. “రాధేశ్యామ్” విడుదల పోస్ట్ పోన్ కానుందని, అందుకే ఇంకా ప్రమోషన్స్ స్టార్ట్ చేయలేదని వార్తలు వస్తున్నాయి. ఈ క్రమంలోనే ఫ్రస్ట్రేట్ అయిన అభిమాని…ఇలా చేశాడని తెలుస్తోంది.
ఈ నేపథ్యంలో తాజాగా నవంబర్ 15న ‘రాధేశ్యామ్’ ఫస్ట్ సింగిల్ వస్తుందని, ప్రభాస్ అభిమానులు రెడీగా ఉండాలంటూ ప్రచారం జరుగుతోంది. కానీ, దీనిపై మేకర్స్ ఇంకా అధికారికంగా ఎలాంటి ప్రకటన చేయలేదు.
