టాలీవుడ్ విలక్షణ దర్శకుడు క్రిష్ జాగర్లమూడి, పవర్‌స్టార్‌ పవన్ కల్యాణ్ ల కాంబోలో తెరకెక్కుతోన్న ‘హరిహర వీరమల్లు’ సినిమాపై భారీ అంచనాలున్న సంగతి తెలిసిందే. భీమ్లా నాయక్ రీమేక్ కావడంతో ఈ సినిమాపై పవన్ ఫ్యాన్స్ చాలా ఆశలు పెట్టుకున్నారు. ఇప్పటికే ఈ సినిమా నుంచి విడుదలైన ఫస్ట్ గ్లింప్స్ వైరల్ అయింది. ఈ క్రమంలోనే శ్రీరామ నవమి సందర్భంగా ఈ చిత్రం నుంచి పవన్ సరికొత్త పోస్టర్ ను చిత్రయూనిట్ రిలీజ్ చేసింది.
ఉగ్రరూపంలో శత్రువులతో పోరాడుతున్న పవన్ లుక్ సోషల్ మీడియాలో వైరల్ అయింది. చేతిలో ఈటె పట్టుకున్న పోరాట యోధుడిగా పవన్ పవర్ ఫుల్ లుక్ ఫ్యాన్స్ లో జోష్ నింపింది. పవన్ వెనుక సముద్రంతో పాటు భారీ ఓడలు కనిపించడం ఆసక్తిని రేపుతోంది. మొఘలుల కాలం నాటి ఓ పోరాటయోధుడి కథతో యాక్షన్ ఎంటర్ టైనర్ గా ఈ సినిమా తెరకెక్కుతోంది. పవన్ తన కెరీర్ లో తొలిసారిగా పీరియాడిక్ యాక్షన్ డ్రామా నేపథ్యంలో నటిస్తున్న ఈ చిత్రాన్ని మెగా సూర్య ప్రొడ‌క్ష‌న్స్ బ్యాన‌ర్‌పై ప్రముఖ తమిళ నిర్మాత ఏఎమ్ ర‌త్నం, ద‌యాక‌ర్ రావు నిర్మిస్తున్నారు.
ఇవాళ శ్రీరామ నవమి సందర్భంగా పవన్ కల్యాణ్ సెట్స్ పైనే పూజా కార్యక్రమాలు నిర్వహించారు. వీరమల్లు గెటప్ లో ఉన్న ఆయన సెట్స్ పై ఏర్పాటు చేసిన రాములవారి చిత్ర పటానికి పూజలు చేసి షూటింగ్ కొనసాగించారు. గత కొన్ని రోజులుగా హైదరాబాదులో పవన్ కల్యాణ్ పై కీలక పోరాట సన్నివేశాలను తెరకెక్కిస్తున్నారు. హాలీవుడ్ స్టంట్ డైరెక్టర్ టోడోర్ లాజరోవ్ పర్యవేక్షణలో ఈ ఫైట్ సీక్వెన్స్ లు చిత్రీకరిస్తున్నారు. వాటికి సంబంధించిన ఫోటోలు సోషల్ మీడియాలో వైరల్ అయ్యాయి.
