యంగ్ టైగ‌ర్ ఎన్టీఆర్ న‌టించిన లేటెస్ట్ మూవీ `దేవర పార్ట్ 1` విడుద‌ల‌కు సిద్ధ‌మైన సంగ‌తి తెలిసిందే. కొర‌టాల శివ డైరెక్ట్ చేసిన ఈ హైఓల్టేజ్ యాక్ష‌న్ ఫిల్మ్ లో జాన్వీ క‌పూర్ హీరోయిన్‌గా, బాలీవుడ్ స్టార్ సైఫ్ అలీ ఖాన్ ప్ర‌తినాయ‌కుడిగా అల‌రించ‌బోతున్నారు. సెప్టెంబ‌ర్ 27న తెలుగుతో పాటు త‌మిళ్‌, కన్న‌డ, మ‌ల‌యాళ, హిందీ భాష‌ల్లో దేవర అట్ట‌హాసంగా విడుద‌ల కాబోతోంది. రిలీజ్ డేట్ దగ్గర ప‌డుతున్న నేప‌థ్యంలో చిత్ర‌బృందం ప్ర‌మోష‌న్స్ లో వేగం పెంచింది.
ఇందులో భాగంగానే మంగ‌ళ‌వారం ముంబై వేదిక‌గా దేవర ట్రైలర్ ను లాంచ్ చేయ‌గా.. ప్రేక్ష‌కుల నుంచి విశేష‌మైన రెస్పాన్స్ వ‌చ్చింది. ట్రైలర్ తో సినిమాపై అంచ‌నాలు తారా స్థాయికి చేరుకున్నాయి. ఆర్ఆర్ఆర్ త‌ర్వాత ఎన్టీఆర్ కు మ‌రో బిగ్ హిట్ ఖాయ‌మ‌ని అభిమానులు ఎంతో న‌మ్మ‌కంగా ఉన్నారు. ఇదిలా ఉంటే.. దేవర గురించి ప్ర‌స్తుతం ఓ ఇంట్రెస్టింగ్ న్యూస్ నెట్టింట చ‌క్క‌ర్లు కొడుతోంది.
దేవ‌రకు ఫ‌స్ట్ ఛాయిస్ ఎన్టీఆర్ కాదు అన్న‌దే ఆ వార్త సారాంశం. ఎన్టీఆర్ క‌న్నా ముందే కొర‌టాల శివ దేవర స్టోరీని మ‌రొక స్టార్ హీరో వ‌ద్ద‌కు తీసుకెళ్లాడ‌ట. ఈ హీరో మ‌రెవ‌రో కాదు ఐకాన్ స్టార్ అల్లు అర్జున్. గ‌తంలో కొర‌టాల శివ, అల్లు అర్జున్ కాంబినేష‌న్ లో `AA21` వ‌ర్కింగ్ టైటిల్ తో ఓ సినిమా ప్రకటన వ‌చ్చింది. యువసుధా ఆర్ట్స్, గీతా ఆర్ట్స్ సంయుక్తంగా ఈ చిత్రాన్ని నిర్మిస్తాయని తెలియ‌జేశారు.
అలాగే స‌ముద్రం బ్యాక్‌డ్రాప్ లో సినిమా ఉంటుంద‌ని హిట్ ఇస్తూ ప్రీ లుక్ పోస్టర్ ను విడుద‌ల చేశారు. కానీ ఏమైందో ఏమో ఆ ప్రాజెక్ట్ ఆరంభంలోనే అట‌కెక్కింది. ఆ త‌ర్వాత కొర‌టాల శివ ఎన్టీఆర్ తో దేవర సినిమాను తెర‌కెక్కించారు. అయితే AA21 థీమ్ పోస్టర్, దేవర ట్రైలర్ కి చాలా దగ్గర పోలిక‌లు క‌నిపిస్తున్నాయి. స‌ముద్రం బ్యాక్‌డ్రాప్‌లోనే దేవర మూవీని రూపొందించారు. దీంతో అల్లు అర్జున్ తో అనుకున్న కథనే ఎన్టీఆర్ తో దేవరగా తీశార‌ని సోష‌ల్ మీడియాలో చ‌ర్చించుకుంటున్నారు. మ‌రి ఈ విష‌యంపై కొర‌టాల శివ ఎలా స్పందిస్తారో చూడాలి.
