ఫిల్మ్ స్టార్స్ కేవలం సినిమాల మీదే ఆధారపడి ఉంటారు అనుకుంటే పొరపాటే. చాలామంది నటీనటులు ఓవైపు యాక్టింగ్ కెరీర్ ను కొనసాగిస్తూనే.. మరోవైపు వ్యాపార రంగంలో రాణిస్తున్నారు. ఇప్పుడు ఈ జాబితాలో మన టాలీవుడ్ హీరో నితిన్ కూడా చేరబోతున్నాడు. త్వరలోనే ఈయన కొత్త బిజినెస్ స్టార్ట్ చేయబోతున్నాడు. ఇప్పటికే టాలీవుడ్ లో చాలా మంది హీరోలు రకరకాల వ్యాపారాల్లో సత్తా చాటుతున్నారు. అయితే ఇటీవల కాలంలో మల్టీప్లెక్స్ థియేటర్ బిజినెస్ అనేది బాగా ప్రాచూర్యం పొందింది.
ఇప్పటికే టాలీవుడ్ సూపర్ స్టార్ మహేష్ బాబు, విజయ్ దేవరకొండ, అల్లు అర్జున్ వంటి హీరోలు ఈ మల్టీప్లెక్స్ బిజినెస్ లోకి అడుగుపెట్టారు. వీరి బాట‌లోనే నితిన్ కూడా నడవబోతున్నాడట. ఏషియన్ సంస్థతో కలిసి ANS సినిమాస్ అనే మల్టీప్లెక్స్ ను నితిన్ స్టార్ట్ చేయ‌నున్నాడంటూ ప్ర‌స్తుతం నెట్టింట జోరుగా ప్ర‌చారం జ‌రుగుతోంది.
తెలంగాణలోని సంగారెడ్డి పట్టణంలో సితార పేరుతో నితిన్ కు ఆల్రెడీ ఒక థియేటర్ ఉంది. అయితే ఏషియన్ సంస్థతో కలిసి ఇదే థియేటర్ ను స‌రికొత్త హంగుల‌తో మల్టీప్లెక్స్ గా నిర్మిస్తున్నార‌ట. ఈ మల్టీప్లెక్స్ కు ఏషియన్ నితిన్ సితార(ఏఎన్ఎస్‌) అనే పేరు పెడుతున్నార‌ని.. రేనోవేషన్ ప‌నులు కూడా ప్రారంభం అయ్యాయ‌ని అంటున్నారు. ఇదే నిజ‌మైతే సంగారెడ్డి చుట్టుపక్కల ప్రాంతాల ప్రజలకు పండ‌గ‌నే చెప్పుకోవ‌చ్చు.
ఎందుకంటే ఇప్ప‌టి వ‌ర‌కు హైదరాబాద్, విజయవాడ, వైజాగ్ వంటి పెద్ద పెద్ద సిటీస్‌కు మాత్ర‌మే మల్టీప్లెక్స్ లు ప‌రిమితం అయ్యాయి. కానీ ఇప్పుడు మన హీరోల కార‌ణంగా చిన్ని చిన్న పట్టణాల ప్రజలకు సైతం మల్టీప్లెక్స్ ఎక్స్‌పీరియన్స్‌ అందుబాటులోకి వ‌స్తున్నాయి. కాగా, నితిన్ సినిమాల విష‌యానికి వ‌స్తే.. ప్ర‌స్తుతం ఈయన తమ్ముడు, రాబిన్ హుడ్ అనే చిత్రాల‌తో బిజీగా ఉన్నాడు. భీష్మ త‌ర్వాత హిట్ ముఖ‌మే చూడ‌లేక‌పోయిన నితిన్ ను ఈ రెండు సినిమాలైనా నిల‌బెడ‌తాయా.. లేదా.. అన్న‌ది చూడాలి.
