మోహన్ బాబు పరువు విష్ణు తీయడం ఏంటి.. అంత పని ఎందుకు చేస్తాడు అంటారా? నిజానికి తన తండ్రితో ఈ దశలో ‘సన్ ఆఫ్ ఇండియా’ సినిమాను నిర్మించడంతోనే ఆయన పరువుకు భంగం కలిగించే పని చేశాడు మంచు విష్ణు.
ఈ సినిమా శుక్రవారం రిలీజవుతుంటే.. రెండు రోజుల ముందు నుంచి #Sonofindia హ్యాష్ ట్యాగ్ నేషనల్ లెవెల్లో ట్రెండ్ అవుతూ వచ్చింది. రిలీజ్ ముంగిట సినిమా పేరు ఇలా ట్రెండ్ అయింది అంటే.. మంచి బజ్ ఉందని అనుకుంటాం. కానీ అక్కడ జరిగింది వేరు.
సన్ ఆఫ్ ఇండియా సినిమాకు రెండు తెలుగు రాష్ట్రాల్లో ఎక్కడా బుకింగ్సే జరగకపోవడం.. అక్కడక్కడా ఒకటీ అరా టికెట్ల మాత్రమే అమ్ముడవడం గురించి తెగ ట్రోల్ చేస్తూ నెటిజన్లు పండుగ చేసుకుంటున్న నేపథ్యంలో ఆ హ్యాష్ ట్యాగ్ ట్రెండ్ అయింది. ఒక సినిమా రిలీజ్ ముంగిట ఈ స్థాయిలో దాని గురించి ట్రోలింగ్ జరగడం ఇంతకుముందెన్నడూ జరిగి ఉండదేమో. ఒక్కరూ ఈ సినిమా గురించి పాజిటివ్‌గా స్పందించింది లేదు. మొత్తం ట్రోల్ మెసేజ్‌లే నిండిపోయాయి ట్విట్టరంతా.
రిలీజ్ ముంగిట పరిస్థితి ఇలా ఉంటే.. రిలీజ్ రోజు ఇంకెవరో మోహన్ బాబును, ఆయన సినిమాను ట్రోల్ చేయడమేంటి, మేమే ఆ పని చేస్తాం అన్నట్లుగా ఈ చిత్రాన్ని నిర్మించిన మంచు విష్ణు సొంత నిర్మాణ సంస్థ ‘24 ఫ్రేమ్స్ ఫ్రేమ్స్ ఫ్యాక్టరీ ఒక యూట్యూబ్ వీడియోను ట్విట్టర్లో షేర్ చేసింది.
అది ‘సన్ ఆఫ్ ఇండియా’ పబ్లిక్ టాక్‌కు సంబంధించిన వీడియో. అందులో సినిమాను తెగ పొగిడేస్తున్నారు ఒక్కొక్కరు. కానీ కాస్త జాగ్రత్తగా గమనిస్తే అది ‘సన్ ఆఫ్ ఇండియా’కు సంబంధించిన టాక్ కాదని అర్థమైపోతుంది. ఇండియా-పాకిస్థాన్ బ్యాక్ డ్రాప్‌లో.. టెర్రరిజం నేపథ్యంలో తెరకెక్కిన సినిమా అని.. రెండున్నర గంటల పాటు ప్రేక్షకలకు సమయమే తెలియదని అంటున్నారు ఆ వీడియోలో. నిజానికి ‘సన్ ఆఫ్ ఇండియా’ కథకు ఆ మాటలకు సంబంధం లేదు. పైగా ఇదేమో గంటన్నర నిడివి సినిమా.
గత వారం రిలీజైన ‘ఎఫ్ఐఆర్’ సినిమాకు సంబంధించిన పబ్లిక్ టాక్‌నే తీసుకొచ్చి ‘సన్ ఆఫ్ ఇండియా’ పబ్లిక్ టాక్ అని చెప్పే ప్రయత్నం జరిగిందన్నది స్పష్టం. బహుశా ‘సన్ ఆఫ్ ఇండియా’ చూసొచ్చిన ప్రేక్షకుల ముందు మైకు పెడితే ఒక్కరూ పాజిటివ్‌గా మాట్లాడినట్లు లేరు. దీంతో ఇలా వేరే సినిమా టాక్‌ను దీనికి పెట్టేసి వీడియో చేసినట్లున్నారు.
దాన్ని మంచు విష్ణు సంస్థ అఫీషియల్ హ్యాండిల్లో పెట్టి సూపర్ సినిమా టికెట్లు బుక్ చేసుకోండంటూ ట్వీట్ వేయడం విడ్డూరం. ఇంకా చిత్రమైన విషయం ఏంటంటే.. ఈ హ్యాండిల్లో షేర్ చేసిన వీడియోకు సంబంధించి థంబ్ నైల్‌లో ‘ఆయన అరిచాడు దోమలు కరిచాయి థియేటర్లో ఒక్కడు లేడు’ అనే థంబ్ నైల్ ఉంది. ఇలాంటి లింక్ షేర్ చేయడం అంటే మోహన్ బాబును పరువును విష్ణునే తీయడం కాక మరేంటి ?
