కేవలం ‘అర్జున్ రెడ్డి’ అనే ఒక్క సినిమాతో దర్శకుడిగా సందీప్ రెడ్డి వంగ తెచ్చుకున్న క్రేజ్ అంతా ఇంతా కాదు. తర్వాత ‘అర్జున్ రెడ్డి’ని హిందీలో ‘కబీర్ సింగ్’గా రీమేక్ చేసి అక్కడా బ్లాక్ బస్టర్ సక్సెస్ అందుకున్నాడతను. దీని తర్వాత సందీప్ చేస్తున్న ‘యానిమల్’కు క్రేజ్ మామూలుగా లేదు. ఇంతకుముందు రిలీజ్ చేసిన టీజర్.. ఈ మధ్యే వచ్చిన ట్రైలర్ ‘యానిమల్’ మీద అంచనాలను భారీగా పెంచాయి.
ఈ చిత్రం నుంచి తాజాగా తొలి పాట రిలీజ్ చేశారు. ఈ పాట గురించి అనౌన్స్ చేస్తూ రిలీజ్ చేసిన పోస్టరే చర్చనీయాంశంగా మారింది. హీరో హీరోయిన్ల రణబీర్ కపూర్, రష్మిక మందన్నా ప్రైవేట్ జెట్లో కూర్చుని లిప్ లాక్ చేస్తున్న దృశ్యం చూసి అందరూ ఆశ్చర్యపోయారు. ఇక ఈ రోజు ఫుల్ సాంగ్ బయటికి రాగా.. అందులోని దృశ్యాలు మరింత ఆశ్చర్యపరుస్తున్నాయి. ఫ్లైట్ నడుస్తుండగానే ఇద్దరూ రొమాన్స్ చేసే దృశ్యాలు హాట్ టాపిక్‌గా మారాయి.
ఈ పాట రిలీజైన దగ్గర్నుంచి సోషల్ మీడియాలో మీమ్స్ మోత మోగిపోతోంది. ముఖ్యంగా ‘నేనింతే’ సినిమాలో హీరోకు డైరెక్టర్ అవతారంలో వేణు మాధవ్.. ఓవర్ ద టాప్ సీన్లు చెప్పి బోల్తా కొట్టించడానికి ప్రయత్నించే సన్నివేశంతో.. ఈ పాటలోని దృశ్యాలను పోలుస్తూ తయారైన మీమ్స్ నెటిజన్లను ఆకట్టుకుంటున్నాయి. రొమాంటిక్ సీన్లు ఎక్కడ తీద్దాం అని నిర్మాత అడిగితే.. కార్లో ఆల్రెడీ చేశామని.. బైక్ మీద కూడా తీశామని.. ప్రైవేట్ జెట్లో ప్లాన్ చేద్దామని సందీప్ అంటే.. నిర్మాత సూపర్ ఐడియా తలైవా అంటూ కొనియాడుతున్నట్లుగా ఉన్న ఒక మీమ్ వైరల్ అవుతోంది.
మొత్తంగా ఈ ఫ్లైట్ రొమాన్స్ మీద బోలెడన్ని జోకులు, మీమ్స్ పేలుతున్నాయి సోషల్ మీడియాలో. ఈ పాటతో సినిమాకు కావాల్సినంత ప్రచారం లభించేలా కనిపిస్తోంది. ‘యానిమల్’ డిసెంబరు 1న పాన్ ఇండియా స్థాయిలో రిలీజ్ కానున్న సంగతి తెలిసిందే.
