టాలీవుడ్ సూపర్ స్టార్ మహేష్ బాబు, దర్శకధీరుడు రాజమౌళి కాంబినేషన్ లో ఓ భారీ ప్రాజెక్టు ప్రారంభం కాబోతున్న సంగతి తెలిసిందే. ఈ చిత్రాన్ని శ్రీ దుర్గా ఆర్ట్స్ బ్యానర్ పై సీనియర్ ప్రొడ్యూసర్ కె. ఎల్ నారాయణ నిర్మించబోతున్నారు. ప్రముఖ రచయిత విజయేంద్ర ప్రసాద్ కథ అందిస్తున్నారు. రాజ‌మౌళితో చేయబోయే చిత్రం కోసం మహేష్ బాబు భారీగా జుట్టు పెంచుతూ మేకోవర్ అవుతున్నాడు.
అయితే యాక్షన్ అడ్వెంచర్ గా ఈ సినిమా రాబోతోంది అన్న సమాచారం మినహా.. కొత్త విషయాలు ఏమీ బయటకు రావడం లేదు. ఇలాంటి తరుణంలో మహేష్ బాబు-రాజమౌళి సినిమా టైటిల్ గురించి ఓ క్రేజీ న్యూస్ నెట్టింట వైరల్ గా మారింది. `గరుడ` అనే పవర్ ఫుల్ టైటిల్ వీరి కాంబో చిత్రానికి పెట్టబోతున్నారని పెద్ద ఎత్తున ప్ర‌చారం జ‌రుగుతోంది.
ఈ విధంగా ప్ర‌చారం జ‌ర‌గ‌డానికి కార‌ణం లేక‌పోలేదు.. విజువల్‌ డెవలప్‌మెంట్‌ ఆర్టిస్ట్‌ టీపీ విజయన్ తాజాగా గోల్డ్ కలర్‌లో ఉన్న ఓ గద్ద రెక్కలను తన ఇన్‌స్టా పేజ్‌లో పోస్టు చేశారు. అక్క‌డితో ఆగ‌కుండా #SSMB29, #SSMB29DIARIES అనే హ్యాష్‌ ట్యాగ్స్ కూడా జోడించ‌డంతో.. నెట్టింట చర్చలు షురూ అయ్యాయి.
గతంలో డైరెక్ట‌ర్ రాజమౌళి బాహుబలి తర్వాత తాను చేయబోయే ప్రాజెక్ట్‌ ‘గరుడ’ అని వెల్లడించారు. ఈ విష‌యాన్ని అభిమానులు ఇప్పుడు మ‌రోసారి గుర్తుచేసుకుంటున్నారు. పైగా టీపీ విజయన్ కూడా గద్ద రెక్కలు పెట్టి హింట్ అవ్వ‌డంతో.. మహేష్ బాబు-రాజమౌళి సినిమాకు గరుడ అనే టైటిల్ పెట్ట‌బోతున్నార‌నే వార్త ఊపందుకుంది. మ‌రి ఈ న్యూస్ ఎంత వరకు నిజ‌మో తెలియాలంటే చిత్ర‌బృందం నుంచి అధికారిక ప్రకటన రావాల్సిందే.
