సూప‌ర్ స్టార్ మహేశ్ బాబు ప్ర‌స్తుతం `సర్కారు వారి పాట` అనే సినిమా చేస్తున్న సంగ‌తి తెలిసిందే. పరశురామ్ ద‌ర్శ‌క‌త్వం వ‌హిస్తున్న ఈ చిత్రాన్ని మైత్రి మూవీ మేకర్స్, జీఎమ్‌బి ఎంటర్‌టైన్‌మెంట్, 14 రీల్స్ ప్లస్ బ్యాన‌ర్ల‌పై నవీన్ యెర్నేని, వై. రవిశంకర్, రామ్ ఆచంట, గోపి ఆచంట సంయుక్తంగా నిర్మిస్తున్నారు. ఇందులో మహేశ్ బాబు స‌ర‌స‌న కీర్తి సురేష్ న‌టిస్తోంది.
అలాగే మ‌రో ముఖ్య‌మైన పాత్ర‌లో సీనియర్ స్టార్ హీరో, యాక్ష‌న్ కింగ్ అర్జున్ స‌ర్జా క‌నిపించ‌బోతుండ‌గా.. త‌మ‌న్ స్వ‌రాలు అందిస్తున్నారు. శ‌ర‌వేగంగా షూటింగ్ జ‌రుపుకుంటున్న ఈ చిత్రం స‌మ్మ‌ర్‌లో ప్రేక్ష‌కుల‌ను అల‌రించేందుకు మే 12న విడుద‌ల కాబోతోంది. ఈ నేప‌థ్యంలోనే ఈ చిత్రానికి సంబంధించిన మ్యూజికల్ ప్రమోషన్స్ మొద‌లు పెట్టిన మేకర్స్.. ఇప్ప‌టికే ఫ‌స్ట్ సింగిల్ `కళావతి`, సెకెండ్ సింగిల్ `పెన్నీ` సాంగ్స్‌ను బ‌య‌ట‌కు వ‌దిలారు.
ఈ రెండు పాట‌లు ప్రేక్ష‌కుల‌ను విశేషంగా ఆక‌ట్టుకోవ‌డంతో పాటు.. యూట్యూబ్‌లో ఎన్నో రికార్డుల‌ను సైతం నెల‌కొల్పాయి. ఇక ఇప్పుడు `ఉగాది` పండ‌గ రాబోతోంది. దీంతో ఆ రోజు ఈ సినిమా నుంచి ఎలాంటి అప్డేట్ రానుందనేది ఆసక్తికరంగా మార‌గా.. ఓ ఇంట్ర‌స్టింగ్ టాక్ బ‌య‌ట‌కు వ‌చ్చింది. అదేంటంటే.. ఉగాది పండ‌గ కానుక‌గా మహేశ్ ఫ్యాన్స్ కోసం సర్కారు వారి పాట టీమ్ ఓ అదిరిపోయే ట్రీట్‌ను సిద్ధం చేసింద‌ట.
అదే థర్డ్ సింగిల్. ఉగాది రోజున ఈ సినిమా నుంచి మూడో పాట‌ను వదలనున్నార‌ని.. దీనిపై గురువారం అధికారిక ప్ర‌క‌ట‌న కూడా రానుంద‌నే టాక్ ప్ర‌స్తుతం బలంగా వినిపిస్తోంది. ఇదే నిజ‌మైతే.. థర్డ్ సింగిల్‌తో మ‌హేష్ ఇంకెన్ని రికార్డుల‌ను బ‌ద్ద‌లు కొడ‌తాడో చూడాలి. కాగా, భారత బ్యాంకింగ్ రంగాన్ని కదిలించిన ఓ భారీ కుంభకోణం చుట్టూ ఈ సినిమా న‌డుస్తుంద‌ని.. ఇందులో మ‌హేష్ ఒక బ్యాంక్ మేనేజర్ కొడుకు పాత్రను పోషిస్తున్నాడ‌ని అంటున్నారు.
