గత కొంతకాలం నుంచి తెలుగు ఫిల్మ్ ఇండస్ట్రీలో రీ రిలీజ్ ట్రెండ్ జోరుగా నడుస్తున్న సంగతి తెలిసిందే. ఇప్పటికే చాలా ఓల్డ్ చిత్రాలు థియేటర్స్ లో మళ్లీ విడుదలై రికార్డ్ సెట్ చేశాయి. టాలీవుడ్ సూపర్ స్టార్ మహేష్ బాబు కెరీర్‌లో క్లాసిక్ హిట్ గా నిలిచిన మురారి చిత్రం కూడా ఇప్పుడు రిలీజ్ కి సిద్ధమవుతోంది. ఆగస్టు 9న మహేష్ బాబు పుట్టినరోజు సందర్భంగా ఈ సినిమాను రీ రిలీజ్ చేసేందుకు సన్నాహాలు చేస్తున్నారు. ప్రమోషన్స్ కూడా మొదలయ్యాయి.
కృష్ణవంశీ డైరెక్ట్ చేసిన మురారి చిత్రంలో మహేష్ బాబుకు జోడిగా సోనాలి బింద్రే యాక్ట్ చేసింది. తెలుగులో సోనాలి బింద్రేకు ఇదే తొలి చిత్రం. అలాగే మణిశర్మ సంగీతం అందించ‌గా.. లక్ష్మి, ప్ర‌సాద్ బాబు, సుకుమారి, అన్న‌పూర్ణ, కైకాల సత్యనారాయణ, గొల్లపూడి మారుతీరావు త‌దితరులు ఇత‌ర ముఖ్య‌మైన పాత్ర‌ల‌ను పోషించారు. 2001న విడుదలైన మురారి భారీ విజయాన్ని నమోదు చెయ్యడమే కాకుండా ఎన్నో అవార్డులు కొల్ల‌గొట్టింది.
ఇప్పుడు ఈ క్లాసిక్ హిట్ ను రీ రిలీజ్ చేస్తుండ‌టంతో మహేష్ బాబు ఫ్యాన్స్ పండ‌గ చేసుకుంటున్నారు. ఇదిలా ఉంటే.. మురారి రీ రిలీజ్ సందర్భంగా డైరెక్ట‌ర్ కృష్ణవంశీ ఎక్స్ వేదిక‌గా ఫ్యాన్స్ తో చిట్ చాట్ చేశారు. నెటిజ‌న్లు అడిగిన ప్ర‌శ్న‌ల‌కు స‌మాధానం ఇచ్చారు. ఈ క్ర‌మంలోనే ఓ నెటిజన్ `మురారి ఫ్లాప్ మూవీ` అంటూ కామెంట్ చేయ‌డంతో కృష్ణ‌వంశీకి చిర్రెత్తుకొత్తింది.
వెంట‌నే స‌ద‌రు నెటిజన్ కు రిప్లై ఇచ్చారు. `హ‌లో అండీ.. నేను మురారి నిర్మాత ఎన్ రామలింగేశ్వర్రావు గారి నుండి తూర్పుగోదావరి జిల్లా హ‌క్కుల‌ను 5 సంవత్సరాలకు రూ. 55 లక్షలకు కొన్నాను. మొదటి రన్ లో 1 కోటి 30 లక్షలు వ‌చ్చాయి. ఒక‌వేళ క‌లెక్షన్సే కొలమానం అయితే.. అది ఫ్లాప్ చిత్ర‌మా? లేక సూపర్ హిట్టా? అన్న‌ది మీరే నిర్ణయించుకోండి` అంటూ కృష్ణవంశీ స్ట్రోంగ్ కౌంటర్ ఇచ్చారు.
