అవును.. కీర్తి సురేష్ క‌న‌బ‌డుట లేద‌ట. ఈ మాట అంటోంది ఎవ‌రో కాదు.. రంగ్ దె సినిమాలో ఆమె కోస్టార్ నితిన్. కీర్తి చిన్న‌నాటి ఒక‌టి తీసుకొచ్చి దాన్ని ట్విట్ట‌ర్లో షేర్ చేసిన నితిన్.. ‘‘మిస్సింగ్.. క‌న‌బ‌డుట లేదు. డియ‌ర్ అను.. నువ్వు ఎక్క‌డున్నా రంగ్ దె ప్ర‌మోష‌న్ల‌కు రావాల‌ని మా కోరిక.. ఇట్లు నీ అర్జున్’’ అని వ్యాఖ్య జోడించాడు. నితిన్ పోస్ట్ స‌ర‌దాగానే పెట్టాడ‌ని ప్ర‌త్యేకంగా చెప్పాల్సిన పని లేదు.
రంగ్ దె సినిమా మొద‌లైన‌ప్ప‌టి నుంచి నితిన్, కీర్తిల మ‌ధ్య గిల్లి క‌జ్జాలు కొన‌సాగుతూనే ఉన్నాయి. సినిమాలో కూడా వీరి పాత్ర‌లు అలాగే ఉంటాయి. నితిన్‌ను ఏడిపించే పాత్ర‌లో న‌టిస్తోంది కీర్తి ఇందులో. ఈ నేప‌థ్యంలో ఆఫ్ ద స్క్రీన్ కూడా ఇద్ద‌రూ గిల్లిక‌జ్జాల‌ను కొన‌సాగిస్తున్నారు. అవి ప్ర‌మోష‌న్ల‌కు చాలా బాగా ఉప‌యోగ‌ప‌డుతున్నాయి.
రెండు రోజుల కింద‌ట క‌ర్నూలులో జ‌రిగిన ట్రైల‌ర్ లాంచ్ కార్య‌క్ర‌మంలోనూ నితిన్.. కీర్తిని ఆట‌ప‌ట్టించేలా మాట్లాడాడు. ఈ ఈవెంట్‌కు కీర్తి డుమ్మా కొట్టింద‌ని అన్నాడు. ఇప్పుడేమో ట్విట్ట‌ర్లో ఆమె ఫొటో పెట్టి మిస్సింగ్ అంటూ కౌంట‌ర్ వేశాడు.
దీనికి హైదరాబాద్ సిటీ పోలీసులు స్పందించ‌డం విశేషం. ట్విట్ట‌ర్లో హైదరాబాద్ పోలీస్ హ్యాండిల్ నుంచి నితిన్ ట్వీట్‌కు రిప్లై వ‌చ్చింది. బాధ‌ప‌డ‌కు నితిన్.. ఆమె సంగ‌తి మేం చూసుకుంటాం అంటూ ట్వీట్ వేశారు ఆ హ్యాండిల్ నుంచి. దీంతో నితిన్ ట్వీట్ మ‌రింత‌గా వైరల్ అయింది. మ‌రి ఈ ట్వీట్‌పై కీర్తి ఎలా స్పందిస్తుంది.. నితిన్‌కు ఎలా కౌంట‌ర్ ఇస్తుంద‌న్న‌ది చూడాలి.
ఈ సంగ‌త‌లా ఉంచితే.. రంగ్ దె సినిమాను చాలా అగ్రెసివ్‌గా ప్ర‌మోట్ చేస్తోంది చిత్ర బృందం. ఈ సినిమా ప్రి రిలీజ్ ఈవెంట్‌కు త్రివిక్ర‌మ్ ముఖ్య అతిథిగా రానున్నాడు. మార్చి 26న రంగ్ దె ప్రేక్ష‌కుల ముందుకు రానున్న సంగ‌తి తెలిసిందే.
