విలక్షణ దర్శకుడు కొరటాల శివ దర్శకత్వంలో మెగాస్టార్ చిరంజీవి, మెగా పవర్ స్టార్ రామ్ చరణ్ లు కలిసి నటించిన ‘ఆచార్య’ చిత్రం ఏప్రిల్ 29న ప్రేక్షకుల ముందుకు రాబోతోన్న సంగతి తెలిసిందే. ఇప్పటికే ఈ చిత్రం నుంచి రిలీజ్ అయిన సాంగ్స్, పోస్టర్స్, టీజర్, ట్రైలర్ లకు విపరీతమైన స్పందన వచ్చింది. మరో 5 రోజుల్లో సినిమా రిలీజ్ కాబోతోన్న నేపథ్యంలో చిత్ర యూనిట్ ప్రచార కార్యక్రమాల జోరు పెంచింది.
ఈ క్రమంలోనే ఈ రోజు హైదరాబాద్ లో ఈ చిత్రం ప్రీ-రిలీజ్ ఈవెంట్ ను గ్రాండ్ గా నిర్వహించబోతున్నారు. ముందుగా విజయవాడలో ఈ ఈవెంట్ ఉంటుందని ప్రచారం జరిగినా…చివరకు హైదరాబాద్ లోని యూసుఫ్ గూడ పోలీస్ గ్రౌండ్ లో ఈవెంట్ నిర్వహించాలని ఫిక్సయ్యారు. అయితే, ఈ ఈవెంట్ కు ఏపీ సీఎం జగన్ మోహన్ రెడ్డి హాజరవుతారని టాక్ వచ్చింది. అయితే, జగన్ రావడం లేదని, పవన్ కళ్యాణ్, మహేశ్ బాబు, రాజమౌళి లలో ఎవరో ఒకరు కన్ఫమ్ గా వస్తారని తెలుస్తోంది. తెలంగాణ ప్రభుత్వం నుంచి మంత్రి తలసానిగానీ, ఏపీ ప్రభుత్వం నుంచి ఎవరైనా మంత్రిగాని హాజరయ్యే అవకావాలూ ఉన్నాయని తెలుస్తోంది.
ఇక, ఈ ఈవెంట్ సందర్భంగా హైదరాబాద్‌లోని యూసఫ్‌గూడలో టీఎస్‌పీఎస్పీ 1వ బెటాలియన్ మైదానం చుట్టుపక్కల సందడి ఏర్పడింది. ఈ వేడుక నేపథ్యంలో యూసుఫ్ గూడ ప‌రిస‌ర ప్రాంతాల్లో ట్రాఫిక్ ఆంక్షలు విధించారు. ఈ రోజు సాయంత్రం 5 నుంచి రాత్రి 11 గంటల వరకు ఆయా ప్రాంతాల్లో ట్రాఫిక్‌ను డైవర్ట్ చేస్తామని అన్నారు. మైత్రీవనం నుంచి వచ్చే వాహనాలను యూసఫ్గూడ చెక్‌పోస్ట్‌ వైపునకు అనుమతించబోమ‌ని వెల్లడించారు.
ఆ వాహనాలను అక్క‌డి సవేరా ఫంక్షన్‌ హాల్‌ నుంచి కృష్ణకాంత్‌ పార్క్‌, సత్యసాయి నిగమాగమం, కమలాపురి వైపు మళ్లిస్తామని అన్నారు. జూబ్లీహిల్స్‌ నుంచి అమీర్‌పేట వైపునకు వెళ్లే వాహనాలను శ్రీనగర్‌ కాలనీ నుంచి సత్యసాయి నిగమాగమం వైపు మళ్లిస్తామని అన్నారు. అలాగే, పాస్‌లు ఉన్నవారిని మాత్రమే ఈవెంట్ కు అనుమతిస్తామని పోలీసులు స్ప‌ష్టం చేశారు.
