విశ్వవేదిక మీద తెలుగు మూవీ ఆర్ఆర్ఆర్ తన సత్తా చాటటం తెలిసిందే. అస్కార్ ను సొంతం చేసుకోవటం ద్వారా భారతీయ సినిమా సత్తాను ప్రపంచానికి అర్థమయ్యేలా చెప్పటంలో దర్శక ధీరుడు రాజమౌళి తన సత్తా చాటారని చెప్పాలి. ఈ సందర్భంగా ఆర్ఆర్ఆర్ టీంకు ప్రపంచ వ్యాప్తంగాపెద్ద ఎత్తున అభినందనలు వెల్లువెత్తాయి. ఇలాంటి వేళ.. ఏపీ ముఖ్యమంత్రి వైఎస్ జగన్మోహన్ రెడ్డి చేసిన ట్వీట్ పై సింగర్ అద్నాన్ సమీ ఘాటు వ్యాఖ్య చేశారు.
ముఖ్యమంత్రి జగన్ పోస్టు చేసిన అభినందన మెసేజ్ ను తప్పు పడుతూ.. తీవ్ర వ్యాఖ్యలు చేశారు. మొన్నటికి మొన్న ఏపీ ముఖ్యమంత్రిని టార్గెట్ చేసిన ఈ సింగర్.. తాజాగా మరోసారి అలాంటి తీరునే ప్రదర్శించటం.. ఈ సారి మరికాస్త ఘాటుగా రియాక్టు కావటం షాకింగ్ గా మారింది. మరెవరూ లేనట్లుగా ఏపీ ముఖ్యమంత్రిని అదే పనిగా టార్గెట్ చేస్తున్న సింగర్ మీద వైసీపీ అండ్ కో తీవ్రంగా రియాక్టు అవుతుంది.
ఇంతకూ సింగర్ అన్నదేంటి? అసలేం జరిగింది? ముఖ్యమంత్రి జగన్ ను ఏమన్నాడు? అన్న విషయానికి వస్తే.. ఆర్ఆర్ఆర్ అస్కార్ ను సొంతం చేసుకున్న శుభసమయంలో ఏపీ సీఎం ట్విటర్ ఖాతాలో ఒక ట్వీట్ ను పోస్టు చేశారు. అందులో.. ‘తెలుగు పాటకు అస్కార్ రావటం చాలా గర్వంగా ఉంది. తెలుగు పతాకం రెపరెపలాడుతోంది’ అని పేర్కొన్నారు. సీఎం జగన్ ట్వీట్ ను సింగర్ అద్నాన్ తప్పు పట్టారు.
‘‘ముఖ్యమంత్రి జగన్ ది నూతిలో కప్ప మనస్తత్వం’’ అంటూ చేసిన వ్యాఖ్యపై వైసీపీ వర్గాలు తీవ్ర ఆగ్రహాన్ని వ్యక్తం చేస్తున్నాయి. ఇటీవల ఆర్ఆర్ఆర్ కు గోల్డెన్ గ్లోబ్ అవార్డు వచ్చిన సందర్భంగా సీఎం జగన్ చేసిన ట్వీట్ ను తప్పు పట్టిన సింగర్.. తాజాగా రెండోసారి అలాంటి పనే చేయటాన్ని జీర్ణించుకోలేకపోతున్నారు. మరెవరూ లేరన్నట్లుగా సింగర్ కు సీఎం జగన్ చేసిన ట్వీట్ లోనే తప్పులు ఎందుకు కనిపిస్తాయని మండిపడుతున్నారు.
ఈ సింగర్ పుట్టింది లండన్ లో అయినా.. తననుతాను భారతీయ సింగర్ గా అనిపించుకోవటానికి తహతహలాడుతుంటారు. ఇందులో భాగంగానే ప్రముఖుల్ని ఈ తీరులో టార్గెట్ చేసి.. తనను పాపులర్ చేసుకునే ప్రయత్నం చేస్తుంటారన్న ఆరోపణ ఆయనపై ఉంది. జగన్ వ్యాఖ్యల్ని తప్పు పట్టటంపై ఆగ్రహం వ్యక్తమవుతోంది. అయితే.. సింగర్ వాదన మరోలా ఉంది. అత్యుత్తమస్థానాల్లో ఉన్న వారు ప్రాంతీయ సరిహద్దుల్ని చెరిపేసి వ్యాఖ్యలు చేయాలన్నది తన భావనగా స్పష్టం చేస్తుంటారు.
అయితే.. తాము సాధించిన విజయాన్ని లోకలైజ్ చేసుకోవటానికి ఇష్టపడే మన నేతల తీరుకు భిన్నంగా సింగర్ వ్యాఖ్యలు ఉన్నాయి. ఏమైనా తమ అభిమాన నేత చేసిన ట్వీట్ ను తప్పు పడటాన్ని జగన్ అభిమానులు.. ఆయన అనుచరవర్గం మాత్రం సదరు సింగర్ మీద తీవ్ర ఆగ్రహంతో ఉన్నారు. ఇలానే కంటిన్యూ చేస్తే.. ఇబ్బందులు ఖాయమని హెచ్చరిస్తుండటం గమనార్హం.
