మెగా పవర్ స్టార్ రామ్ చరణ్ క్రికెట్ అంటే చాలా ఇష్టమన్న సంగతి తెలిసిందే. గతంలో, హైదరాబాద్ లో జరిగిన ఐపీఎల్ మ్యాచ్ లతో పాటు టీమిండియా ఆడిన కొన్ని మ్యాచ్ లను చరణ్ స్వయంగా స్టేడియానికి వచ్చి వీక్షించారు. ఈ క్రమంలోనే గతంలో చిరంజీవి ఇంటికి కొందరు క్రికెటర్లు వచ్చి వారి ఆతిథ్యాన్ని స్వీకరించారు కూడా. ఈ క్రమంలోనే తాజాగా మరోసారి టీమిండియా క్రికెటర్లు కొందరు నిన్న మెగా పవర్ స్టార్ రామ్ చరణ్ ఇంటికి వెళ్లినట్లు ప్రచారం జరుగుతోంది.
ఆదివారంనాడు హైదరాబాద్ లో భారత్ – ఆస్ట్రేలియాల మధ్య ఫైనల్ టీ20 మ్యాచ్ ముగిసిన అనంతరం వారు చెర్రీ ఇంటికి వెళ్లారట. టీమిండియా కెప్టెన్ రోహిత్ శర్మ, విరాట్ కోహ్లీ, సూర్యకుమార్ యాదవ్, హార్థిక్ పాండ్యాతో పాటు మరికొంత మంది ప్లేయర్స్ చెర్రీ ఇంటికి వెళ్లినట్లుగా తెలుస్తోంది. రామ్ చరణ్ ఇంట్లోని ఓ వ్యక్తితో హార్ధిక్ పాండ్యా దిగిన ఫొటో ఒకటి సోషల్ మీడియాలో వైరల్ గా మారింది. చరణ్ అన్న ఇంటికి క్రికెటర్లు వచ్చారంటూ ఈ రోజు ఉదయం నుంచి మెగా ఫ్యాన్స్ ఈ ఫొటోను వైరల్ చేస్తున్నారు.
అంతేకాదు, చెర్రీ ఇంటికి ఆ క్రికెటర్లందరూ విందు భోజనం చేశారని, చిరు, చెర్రీలతోపాటు మెగా కుటుంబ సభ్యులు కొందరు ఈ విందులో పాల్గొన్నారని అంటున్నారు. చిరుతో పాటు ఆయన కుటుంబ సభ్యులు కూడా క్రికెటర్లతో ఫొటోలు దిగారని ప్రచారం జరుగుతోంది. రామ్ చరణ్ స్వయంగా ఆ ఫొటోలను ఈ రోజు రివీల్ చేస్తారని కూడా మెగా ఫ్యాన్స్ అంటున్నారు. ఆర్ఆర్ఆర్ తో చెర్రీకి పాన్ ఇండియా లెవల్లో భారీగా ఫ్యాన్ ఫాలోయింగ్ వచ్చిన సంగతి తెలిసిందే.
