ప‌వ‌ర్ స్టార్ పవన్ క‌ళ్యాణ్ పుట్టిన రోజు వ‌స్తోందంటే అభిమానుల హంగామా మామూలుగా ఉండ‌దు. కొన్ని రోజుల ముందు నుంచే సోష‌ల్ మీడియాలో హ‌డావుడి నెల‌కొంటుంది. అలాగే ఆఫ్ లైన్లో కూడా చాలా కార్య‌క్ర‌మాలే జ‌రుగుతుంటాయి. ఈసారి సంద‌డి వేరే లెవెల్లో ఉండేలా క‌నిపిస్తోంది. ఆల్రెడీ ఓజీ టీజ‌ర్ కోసం ఉత్కంఠ‌గా ఎదురు చూస్తున్నారు ఫ్యాన్స్. ఆ టీజ‌ర్ గురించి ఇండ‌స్ట్రీ వ‌ర్గాల నుంచి వ‌స్తున్న టాక్ మామూలుగా లేదు.
మ‌రోవైపు గుడుంబా శంక‌ర్ స్పెష‌ల్ షోల హంగామా న‌డుస్తోంది. వాటి కోసం ప్లానింగ్ గ‌ట్టిగానే జ‌రిగింది. సినిమాల ప‌రంగా ఇంకే ర‌క‌మైన అప్డేట్స్, వేడుక‌లు ఉండ‌వ‌నున్నారు.కానీ అభిమానుల‌కు స‌ర్ప్రైజ్‌లు రెడీ అయిపోయాయి. వాటి గురించి వ‌స్తున్న స‌మాచారం అభిమానుల‌ను నిల‌వ‌నీయ‌డం లేదు.
అస‌లు చ‌ర్చ‌ల్లోనే లేకుండా పోయిన హ‌రిహ‌ర వీర‌మ‌ల్లు నుంచి కొత్త పోస్ట‌ర్ రిలీజ్ చేయ‌బోతున్న‌ట్లు నిర్మాణ సంస్థ అప్‌డేట్ ఇవ్వ‌డం పెద్ద స‌ర్ప్రైజే. శుక్ర‌వారం అర్ధ‌రాత్రి దాటాక ఈ పోస్ట‌ర్ రిలీజ్ కానుంది. సినిమా స్టేట‌స్ తెలియ‌జేస్తూ.. రిలీజ్ గురించి ఈ పోస్ట‌ర్లో ఏమైనా ప్రకటన చేస్తారేమో అని అభిమానులు ఎదురు చూస్తున్నారు. మ‌రోవైపు ఉస్తాద్ భ‌గ‌త్ సింగ్ నుంచి కూడా కొత్త పోస్ట‌ర్ వ‌స్తుంద‌ని ద‌ర్శ‌కుడు హ‌రీష్ శంక‌ర్ క‌న్ఫ‌మ్ చేశాడు. ఉద‌యం ఓజీ టీజ‌ర్ ఉంది కాబ‌ట్టి ఉస్తాద్ పోస్ట‌ర్ లాంచ్‌కు ముహూర్తం సాయంత్రం పెట్టుకున్నారు.
ఇదిలా ఉంటే.. క్యాన్సిల్ అయింద‌నుకున్న సురేంద‌ర్ రెడ్డి ప్రాజెక్టు ఒక్క‌సారిగా తెర‌మీదికి రావ‌డం ఇంకో పెద్ద షాక్. ఈ సినిమాకు సంబంధించి చిత్ర బృందం ఆఫీస్ కూడా తెరిచింది. ఇలా వ‌రుస అప్డేట్స్, విశేషాల‌తో ఈసారి పవన్ పుట్టిన రోజుకి ఫ్యాన్స్ ఉక్కిరి బిక్కిరి అయిపోతున్నారు.
