టాలీవుడ్ మ్యాచో హీరో గోపీచంద్ హిట్ కొట్టి చాలా కాలం అయిపోయింది. 2014లో వ‌చ్చిన లౌక్యం త‌ర్వాత ఆ స్థాయి హిట్ ను గోపీచంద్ మళ్లీ చూడ‌లేదు. ఈ ఏడాది ఆరంభంలో విడుద‌లైన భీమా ఫ్లాప్ అయింది. రీసెంట్ గా `విశ్వం` మూవీతో గోపీచంద్ ప్రేక్ష‌కుల‌ను ప‌ల‌క‌రించాడు. శ్రీ‌ను వైట్ల డైరెక్ట్ చేసిన ఈ చిత్రానికి ప్రేక్ష‌కుల నుంచి మిక్స్డ్ రివ్యూలు వ‌చ్చారు. క‌లెక్ష‌న్స్ కూడా అంతంత మాత్రంగానే సాగుతున్నాయి. విశ్వంతో అయినా స‌క్సెస్ ట్రాక్ ఎక్కాల‌ని ఆశ‌ప‌డిన గోపీచంద్ కు ఒకింత నిరాశే ఎదురైంది.
అయితే ఇలాంటి త‌రుణంలో గోపీచంద్ కు ఓ గోల్డెన్ ఛాన్స్ వ‌రించింద‌ట. పాన్ ఇండియా సెన్సేష‌న్ ప్రభాస్ మూవీలో విలన్ గా న‌టించే అవ‌కాశం గోపీచంద్ కు వ‌చ్చింద‌ట. గ‌తంలో జ‌యం, నిజం, వ‌ర్షం వంటి చిత్రాల్లో ప్ర‌తినాయ‌కుడిగా న‌టించిన అనుభ‌వం గోపీచంద్ కు ఉంది. కానీ హీరోగా ట‌ర్న్ తీసుకున్నాక నెగ‌టివ్ క్యారెక్ట‌ర్స్ వైపు గోపీచంద్ చూడ‌లేదు. ప‌లువురు స్టార్ హీరోల సినిమాల్లో విలన్ పాత్ర‌లు వ‌చ్చిన‌ప్ప‌టికీ వాటిని సున్నితంగా తిర‌స్క‌రించాడు.
అయితే ఇటీవ‌ల ఓ ప్ర‌మోష‌న‌ల్ ఇంట‌ర్వ్యూలో గోపీచంద్ మాట్లాడుతూ.. త‌న‌కు విలన్ రోల్స్ చేసే ఆస‌క్తి లేద‌ని, కానీ నా బెస్ట్ ఫ్రెండ్ అయిన ప్రభాస్ మూవీలో విలన్ రోల్ చేయాల్సి వస్తే, తప్పకుండా చేస్తానని పేర్కొన్నాడు. దీంతో ప్ర‌ముఖ డైరెక్ట‌ర్ హను రాఘ‌వ‌పూడి గోపీచంద్ ను సంప్ర‌దించార‌ట. ప్ర‌స్తుతం హను ప్రభాస్ ను హీరోగా పెట్టి ఓ హిస్టారిక‌ల్ యాక్షన్ డ్రామాని తెర‌కెక్కిస్తున్న సంగ‌తి తెలిసిందే. ఇమాన్వి హీరోయిన్ గా న‌టిస్తున్న ఈ చిత్రానికి `ఫౌజీ` అనే టైటిల్ ప‌రిశీల‌న‌లో ఉంది.
ఫౌజీ లో విలన్ పాత్ర కోసం దర్శకుడు హను గోపీచంద్ తో సంప్ర‌దింపులు జ‌రుపుతున్నార‌ట. కానీ ఇంత వరకు గోపీచంద్ త‌న నిర్ణ‌యం చెప్ప‌లేద‌ని టాక్‌. వాస్త‌వానికి హీరోగా గోపీచంద్ కెరీర్ ఇప్పుడు డేంజ‌ర్ జోన్ లో ఉంది. వ‌రుస ఫ్లాపుల కార‌ణంగా అత‌ని మార్కెట్ భారీగా ప‌డిపోయింది. ఇలాంటి టైమ్ లో ప్రభాస్ మూవీ చేస్తే అది క‌చ్చితంగా గోపీచంద్ కు ప్ల‌స్సే అవుతుంది. పాన్ ఇండియా స్థాయిలో క్రేజ్ ల‌భిస్తుంది. మ‌రి ఇవ‌న్నీ దృష్టిలో ఉంచుకుని గోపీచంద్ ఫౌజీ చిత్రానికి ఎస్ చెబుతాడా..? లేక నో చెబుతాడా..? అన్న‌ది చూడాలి.
