గత దశాబ్దకాలంగా ప్రేమ వివాహాలు చేసుకుంటున్న వారి సంఖ్య బాగా పెరిగిన సంగతి తెలిసిందే. కులాంతర, మతాంతర, ఖండాంతర వివాహాలు కామన్ అయిపోయాయి. కొన్ని ప్రేమ జంటలకు ఇరు పక్షాల తల్లిదండ్రులు దగ్గరుండి పెళ్లి జరిపిస్తున్నారు. కానీ, కొన్ని ప్రేమ వివాహాలు ఇరు వర్గాల తల్లిదండ్రులకు లేదంటే అబ్బాయి లేక అమ్మాయి తల్లిదండ్రులకో ఇష్టం లేని సందర్భాలు కూడా ఉన్నాయి. కొన్ని కులాంతర, మతాంతర వివాహాలు పరువు హత్యలు, దాడులకు దారి తీసిన ఘటనలూ ఉన్నాయి.
మిర్యాలగూడ మారుతీరావు తరహా ఘటనలు సంచలనం రేపిన వైనం తెలిసిందే. అయితే, తాజాగా ప్రేమ వివాహం చేసుకొని వెళ్లిపోయిన ఓ కూతురుపై కోపంతో ఓ తండ్రి తన ఆవేదనను వినూత్న రీతిలో వ్యక్తపరచడం సంచలనం రేపింది. తన కూతురు చనిపోయిందంటూ ఫ్లెక్సీ వేయించి అశ్రు నివాళి తెలిపిన వైనం చర్చనీయాంశమైంది. తన ఇంటి ముందు గోడకు ఆ ఫ్లెక్సీని అతికించి తన ఆవేదనను సోషల్ మీడియా వేదికగా షేర్ చేశాడు ఆ తండ్రి. మరే తండ్రికీ ఇలాంటి కష్టం రాకూడదని ఇలా చేశానని చెబుతున్నారు.
‘‘అయ్యలారా, అమ్మలారా జాగ్రత్తగా మీ పిల్లలను కాపాడుకోండి…బిడ్డలారా మీరు మోసపోవద్దు, మీ తల్లిదండ్రులకు గుండెకోత మిగల్చవద్దు’’ అంటూ కన్నీటిపర్యంతమైన ఆ తండ్రి ఆవేదనాభరిత వీడియో వైరల్ గా మారింది. రాజన్న సిరిసిల్ల జిల్లాలో జరిగిన ఈ ఘటన హాట్ టాపిక్ గా మారింది.
రాజన్న సిరిసిల్ల జిల్లాలో చిలువేరి అనూష్ణ బీటెక్ చదువుతోంది. కొంతకాలంగా ఓ యువకుడిని ప్రేమిస్తోంది. ఈ విషయం అనూష్ణ తండ్రికి తెలియడంతో ఆ యువకుడిని మర్చిపోవాలని చెప్పారు. తండ్రి మాట వినకుండా ఇటీవల ఇంట్లో నుంచి వెళ్లిపోయిన అనూష్ణ ప్రియుడిని పెళ్లి చేసుకుంది. ఆ యువకుడి మాయమాటలకు తన బిడ్డ మోసపోయిందని ఆవేదన చెందుతూ తన కూతురు చనిపోయిందని బంధుమిత్రులకు సమాచారమిచ్చారు.
ఇష్టం లేని పెళ్లి చేసుకుందని కూతురి చావు ఫ్లెక్సీ కొట్టించిన తండ్రి
సిరిసిల్ల పట్టణంలో చిలువేరి మురళి కూతురు చిలువేరి అనూష ఒక అబ్బాయిని ప్రేమించి ఇంటి నుండి వెళ్ళిపోయి వివాహం చేసుకుంది.
కూతురు ఇష్టం లేని పెళ్లి చేసుకుందని చిలువేరి మురళి తన బిడ్డ చనిపోయింది అంటూ ఫ్లెక్సీ… pic.twitter.com/6ulb1dCIad
— Telugu Scribe (@TeluguScribe) April 8, 2024
