ఏపీ ఉప ముఖ్యమంత్రి, పవర్ స్టార్ పవన్ కళ్యాణ్ పుట్టినరోజు నేడు. సోషల్ మీడియా పుట్టినరోజు శుభాకాంక్షలు వెల్లువెత్తుతున్నాయి. మరో వైపు గబ్బర్ సింగ్ రీ రిలీజ్ నేపథ్యంలో అభిమానులు, జనసేన కార్యకర్తలు సినిమా థియేటర్ల వద్ద సంబరాలు చేసుకుంటున్నారు. అయితే ఏపీలో భారీ వరదల కారణంగా విజయవాడ నగరం నీట మునిగిన నేపథ్యంలో ఈ రోజు పలు సినిమాల అప్ డేట్స్ తో పాటు, పుట్టినరోజు సంబరాలకు దూరంగా ఉండాలని పవన్ కళ్యాణ్ భావిస్తున్నట్లు సమాచారం.
పుట్టినరోజును పురస్కరించుకుని సుజిత్ దర్శకత్వంలో తెరకెక్కుతున్న పవన్ కళ్యాణ్ ‘ఓజీ’ నుండి పోస్టర్ విడుదల చేయాలని నిర్ణయించారు. అయితే తాజాగా ‘ఏపీ, తెలంగాణలలో భారీ వర్షాల కారణంగా ప్రజలు ఇబ్బందులు ఎదుర్కొంటున్న నేపథ్యంలో ఓజీ అప్ డేట్స్ విడుదల వాయిదా వేస్తున్నాం’ నిర్మాణ సంస్థ ప్రకటించింది.
ఇక దీంతో పాటు హరిహర వీరమల్లు నుండి కూడా పోస్టర్ విడుదల చేయాలని భావించారు. ‘‘భారీ వర్షాల కారణంగా తెలుగు రాష్ట్రాల ప్రజలు ఇబ్బందులు పడుతున్నారు. హరిహర వీరమల్లు నుండి ఆసక్తికర పోస్టర్ విడుదల చేయాలని భావించాం. కానీ ఇది సరైన సమయం కాదని భావిస్తున్నాం, పవన్ అభిమానులు ఈ పరిస్థితిని అర్ధం చేసుకోవాలి’’ అని నిర్మాణసంస్థ ప్రకటించింది.
