చిత్తూరు జిల్లా వైసీపీ అధ్యక్షుడిగా భూమన కరుణాకర్ రెడ్డిని ఆ పార్టీ అధినేత జగన్ నియమించిన సంగతి తెలిసిందే. ఈ క్రమంలోనే ఈ కార్యక్రమంలో మాజీ ఎమ్మెల్యే చెవిరెడ్డి భాస్కర్ రెడ్డి కూడా పాల్గొన్నారు. ఈ సందర్భంగా చెవిరెడ్డి చేసిన వ్యాఖ్యలు వైరల్ గా మారాయి. రియల్ ఎస్టేట్ వ్యాపార దిగ్గజం, కాబోయే తుడా చైర్మన్ డాలర్స్ దివాకర్ రెడ్డి తన కొడుకు మోహిత్ రెడ్డిని గత ఎన్నికల్లో ఓడించారని ఆయన స్వయంగా అంగీకరించారు.
డాలర్స్ దివాకర్ రెడ్డి వల్లే తన కుమారుడు ఎన్నికల్లో ఓటమిపాలయ్యారని చెవిరెడ్డి ఒప్పుకోవడం ఆసక్తికరంగా మారింది. ఎన్నికలు పూర్తయి 6 నెలలు గడుస్తున్నా ఇంకా డాలర్స్ దివాకర్ రెడ్డి పేరును బహిరంగ సభలో చెవిరెడ్డి తలుచుకోవడం చర్చనీయాంశమైంది. గత ఎన్నికల్లో టీడీపీ అభ్యర్థి పులివర్తి నాని గెలుపు కోసం డాలర్స్ దివాకర్ రెడ్డి తీవ్రంగా శ్రమించిన సంగతి తెలిసిందే. చంద్రగిరిలో పసుపు జెండా ఎగురవేస్తానని చెప్పి మరీ డాలర్స్ దివాకర్ రెడ్డి పార్టీ జెండాను చంద్రగిరిలో రెపరెపలాడించారు. ఈ క్రమంలోనే ఎన్నికలు పూర్తయి ఇన్ని నెలలు గడుస్తున్నా డాలర్స్ దివాకర్ రెడ్డి పేరును చెవిరెడ్డి మరచిపోలేకపోతున్నారని సోషల్ మీడియాలో కామెంట్లు వస్తున్నాయి. డాలర్స్ దివాకర్ రెడ్డి గురించి చెవిరెడ్డి మాట్లాడిన వీడియో సోషల్ మీడియాలో వైరల్ గా మారింది.
